“O‘zbekkino”ga topshirilgan “O‘zkinoxronika” studiyasining beshta hujjatli filmi rad etildi

“O‘zbekkino” milliy agentligining 2014-yil birinchi choragi yakunlariga bag‘ishlangan kengaytirilgan majlisi bo‘lib o‘tdi. Bu haqda agentlik sayti xabar berdi.

Majlisda hujjatli filmlar ishlab chiqarishda jiddiy kamchiliklar mavjudligi ko‘rsatib o‘tildi.

Yil boshidan beri “O‘zbekkino” milliy agentligiga turli kinostudiyalardan 19 ta hujjatli film ssenariysi kelib tushgan. Shulardan sakkiztasi agentlik badiiy kengashi qarori bilan ishga tushirildi, to‘rttasi qayta ishlashga tavsiya etildi va yettitasi belgilangan talablarga javob bermagani sababli rad etildi. Rad etilgan ssenariylarning aksariyati, ya’ni beshtasi “O‘zkinoxronika” studiyasiga tegishli ekani qayd etildi.

Yig‘ilishda ta’kidlanishicha, kinotarmoqning aholiga xizmat ko‘rsatishi o‘tgan yilning shu davridagiga nisbatan 2,3 foizga, agentlik tizimidagi korxona va tashkilotlarniki esa 1,1 foizga o‘sgan bo‘lsa-da, davlat mablag‘lari evaziga ishlangan filmlarni viloyatlar, ayniqsa, tumanlarda aholiga namoyish qilish borasida ijobiy siljishga erishish nihoyatda qiyin bo‘lmoqda. Buning obyektiv sabablaridan biri avval mavjud bo‘lgan kinotarmoq yo‘q bo‘lib ketgani bo‘lsa, boshqasi respublikadagi ko‘plab kinoteatrlarning xususiylashtirib yuborilganidir.

Avvalroq, agentlik mutaxassislari respublikadagi, mulkchilik shaklidan qat’i nazar, barcha kinoteatrlarning ahvolini monitoring qilib chiqqanida 241 ta mavjud kinoteatrdan atigi 97 tasi o‘z faoliyati bilan shug‘ullanayotgani, 144 tasi esa umuman ishlamayotgani aniqlangani xabar qilingan edi.

Bundan tashqari, majlisda hukumatning viloyatlardagi kinoteatrlar qoshida “Yoshlar markazlari”ni tashkil etish borasidagi topshirig‘ini bajarishga mas’ul bo‘lgan Qoraqalpog‘iston Respublikasining “Qoraqalpoqkino” agentligi, Sirdaryo, Toshkent, Andijon viloyatlari bo‘limlari sustkashlikka yo‘l qo‘yayotgani alohida ta’kidlab o‘tildi va ularning rahbarlari ogohlantirildi.