“Kamolot” yoshlar ijtimoiy harakati “Yangi nigoh” videoroliklar tanlovini e’lon qildi. Tanlov O‘zbekiston Respublikasi Madaniyat va sport ishlari vazirligi, “O‘zbekturizm” Milliy kompaniyasi, O‘zbekiston Respublikasi Tabiatni muhofaza qilish davlat qo‘mitasi, “O‘zbekkino” Milliy agentligi, O‘zbekiston Milliy teleradiokompaniyasi, O‘zbekiston Fanlar akademiyasi, “Oltin meros” xalqaro xayriya jamg‘armasi, Respublika Ma’naviyat targ‘ibot markazi, Milliy g‘oya va mafkura ilmiy-amaliy markazi bilan hamkorlikda tashkil etiladi, deb ma’lum qildi O‘zA.
Tanlovning maqsadi O‘zbekistonda yoshlar turizmini rivojlantirish, tuman va shaharlarning turistik salohiyati, joylardagi tarixiy obidalar, ziyoratgohlar, muhofaza etiladigan tabiiy hududlarni targ‘ib etish, media mahsulotlarning keng tarqalgan turi – videoroliklar yordamida mamlakatning turizm salohiyati to‘g‘risida keng jamoatchilikni xabardor qilishdan iborat.
Tanlov g‘oliblari quyidagi nominatsiyalar bo‘yicha aniqlanadi:
- “O‘zbekistonning turizm salohiyatini namoyon etgan eng yaxshi videorolik”;
- “O‘zbekistonning ekoturizm salohiyatini namoyon etgan eng yaxshi videorolik”;
- “Milliy qadriyat va urf-odatlarni targ‘ib etishga qaratilgan eng yaxshi videorolik”;
- “Videorolik ssenariysi uchun eng yaxshi g‘oya”;
- “O‘zbekistonning muhofaza etiladigan tabiiy hududlari to‘g‘risidagi eng yaxshi videorolik”.
- Ijodiy ishlarni qabul qilish — 2014-yilning 1-oktabrigacha.
- G‘oliblarni aniqlash va taqdirlash marosimini tashkil etish — 2014-yilning 15-noyabrigacha.
Ijodiy ishlar “Kamolot” yoshlar ijtimoiy harakatining tuman (shahar), viloyat kengashlarida qabul qilinadi.
Batafsil ma’lumotlarni “Kamolot” yoshlar ijtimoiy harakati sayti va (8 371) 241-02-72, 241-00-50 telefon raqamlari orqali olishingiz mumkin.
Izoh (0)