O‘zbekiston Davlat Bojxona qo‘mitasi kontrabandaga qarshi kurash bo‘limi xodimlarining boshqa huquqni himoya qilish organlari bilan hamkorlikdagi tezkor harakatlari natijasida mamlakatdan katta miqdordagi rangli metall olib chiqib ketilishining oldi olindi. Bu haqda bojxona qo‘mitasi matbuot xizmati xabar berdi.
Buxoro viloyati Vobkent tumanida yashovchi N. Qurbonovning uyi belgilangan tartibda tintuv qilinish chog‘ida qo‘shni respublikaga olib ketilishga mo‘ljallangan va noqonuniy saqlanayotgan, umumiy qiymati 6 million so‘mga teng 2380 kilogramm rangli metall topildi.
Bundan tashqari, G‘ijduvon tumanidagi J. To‘xtayevga tegishli uy tezkor ma’lumotlar asosida tekshirildi. Natijada 4,8 million so‘mlik 3 tonna rangli metallning noqonuniy saqlanayotgani aniqlandi.
Yuqoridagi faktlar bo‘yicha tergov ishlari olib borilmoqda.
Bojxona statistika ma’lumotlariga ko‘ra, 2014-yilning o‘tgan davri mobaynida bojxona xodimlari tomonidan rangli metall bilan bog‘liq 20 ta qonunbuzarlik holatlari aniqlangan, natijada 33,8 million so‘mga teng 21 tonnadan ziyod metall musodara etilgan.
Izoh (0)