Samsung’ning Google Glass’ga o‘xshash ko‘zoynagi boshning o‘ng qismiga mahkamlanadi va o‘ng ko‘z uchun ekrancha bilan jihozlanadi. Bu haqda Business Korea nashri kompaniyaga yaqin manbasiga tayanib xabar berdi.
Gear Glass deb nomlanuvchi ushbu qurilma shu yilning 5—10-sentabr kunlari Berlinda o‘tkaziladigan Yevropaning yirik elektronika ko‘rgazmasi — IFA-2014’da taqdim etilishi kutilmoqda.
Nashrning taxmin qilishicha, Samsung kompaniyasi Gear savdo belgisini o‘zining barcha taqiluvchi elektronikasiga nisbatan qo‘llaydi. O‘tgan yilning kuzida u Gear 2 va Gear Fit nomlari ostida “aqlli” soati va fitnes-trekerini chiqargan edi.
Elektron ko‘zoynak Tizen OS keyingi avlod operatsion tizimida ishlaydi. Gadjetning displeyi naushnik bilan ulanadi, natijada o‘ng ko‘z bilan ekrandagi ma’lumotni kuzatib, o‘ng quloq bilan musiqa eshitish mumkin bo‘ladi.
Business Korea ma’lum qilishicha, Samsung o‘z qurilmasi uchun AQShda patent olgan, o‘tgan yil oktabrida esa Koreyaning intellektual mulk bo‘yicha agentligida o‘z gadjeti konstruksiyasini ro‘yxatdan o‘tkazgan.
Izoh (0)