Islom Karimov 14-may kuni Jinoyat kodeksiga o‘zgartish kiritib, pora berish va poraxo‘rlikda vositachilik qilish uchun jazoni kuchaytiradigan qonunni imzoladi. Qonun Oliy Majlis Qonunchilik palatasi tomonidan 2-aprelda qabul qilinib, Senat tomonidan 10-aprelda tasdiqlandi. Bu haqda gazeta.uz xabar berdi.
Foto: ru.tsn.ua
15-maydan Jinoyat kodeksining 211- (Pora berish) va 212- (Pora olish-berishda vositachilik qilish) moddalari qayta tahrirlanadi.
Yangilangan 211-moddaga ko‘ra, pora berish eng kam ish haqining 50 dan 100 baravarigacha miqdorda jarima yoki besh yilgacha ozodlikdan mahrum qilish bilan jazolanadi. Moddaning avvalgi mazmuni ushbu jinoyat uchun eng kam oylik ish haqining ellik baravarigacha miqdorda jarima yoki uch yilgacha axloq tuzatish ishlari yoxud olti oygacha qamoq yoki uch yilgacha ozodlikdan mahrum qilish bilan jazolanishini ko‘zda tutgan.
Pora berish takroran, xavfli retsidevist yoki ilgari ushbu Kodeksning 210- (Pora olish) yoki 212- (Pora olish-berishda vositachilik qilish) moddalarida nazarda tutilgan jinoyatlarni sodir etgan shaxs tomonidan ko‘p miqdorda sodir etilgan bo‘lsa, besh yildan o‘n yilgacha ozodlikdan mahrum qilish bilan jazolanadi (avvalgi tahrirda — 3 yildan 5 yilgacha).
Pora berish juda ko‘p miqdorda uyushgan guruh manfaatlarini ko‘zlab, mas’ul mansabdor shaxs tomonidan sodir etilgan bo‘lsa, 10 yildan 15 yilgacha ozodlikdan mahrum qilish bilan jazolanadi (avvalgi tahrirda — 5—10 yil).
Basharti, shaxsga nisbatan pora so‘rab tovlamachilik qilingan bo‘lsa yoki bu shaxs jinoiy harakatlar sodir etilganidan 30 sutka ichida bu haqda o‘z ixtiyori bilan arz qilsa, chin ko‘ngildan pushaymon bo‘lib, jinoyatni ochishda faol yordam bergan bo‘lsa, bunday shaxs javobgarlikdan ozod etiladi.
212-moddaning yangi tahriri pora olish-berishda vositachilik qilish uchun eng kam oylik ish haqining 50 barobaridan 100 baravarigacha miqdorda jarima yoki besh yilgacha ozodlikdan mahrum qilish bilan jazolanishini nazarda tutadi (avval 50 baravarigacha, uch yil axloq tuzatish ishlari yoxud olti oygacha qamoq yoki uch yilgacha ozodlikdan mahrum etish).
