Janubiy Koreyaning GS Engineering & Construction Corp. kompaniyasi prezidenti va bosh direktori Byongyong Lim O‘zbekiston Prezidenti Islom Karimovning Ustyurt gaz-kimyo majmuasi qurilish maydoniga tashrif buyurgani uchun minnatdorlik bildirdi. Kompaniya rahbarining tashakkurnomasi O‘zA tomonidan e’lon qilingan.

“Yaqinda biz Siz bilan uchrashish sharafiga muyassar bo‘ldik. Muhim davlat ishlari bilan g‘oyat band bo‘lishingizga qaramay Oqchaloqdagi Ustyurt gaz-kimyo majmuasi qurilishi maydoniga tashrif buyurganingiz Koreya Respublikasining har uchala muhandislik-qurilish kompaniyasi vakillarida chuqur taassurot qoldirdi”, — deyiladi maktubda.

Shuningdek, GS Engineering & Construction Corp. kompaniyasi rahbari prezident Islom Karimovga Ustyurt gaz-kimyo majmuasining qurilishiga ko‘rsatayotgan yordami uchun ham minnatdorlik bildirgan.

“GS Engineering & Construction Corp. kompaniyasi bosh direktori sifatida ishontirib aytamanki, biz Ustyurt gaz-kimyo majmuasi loyihasini sidqidildan amalga oshiramiz, qurilishni vaqtida muvaffaqiyatli yakunlaymiz va uni foydalanish uchun O‘zbekiston Respublikasiga topshiramiz”, — deya maktubini yakunlagan Byongyong Lim.

Eslatib o‘tamiz, O‘zbekiston Respublikasi Prezidenti Islom Karimov Ustyurt gaz-kimyo majmuasi qurilish ishlari bilan tanishish maqsadida 25-aprel kuni Qoraqalpog‘iston Respublikasiga tashrif buyurgan edi.