12-may kuni O‘zbekiston Respublikasi Markaziy saylov komissiyasining majlisi bo‘lib o‘tdi. Unda komissiya a’zolari, siyosiy partiyalar, O‘zbekiston ekologik harakati va ommaviy axborot vositalari vakillari ishtirok etdi, deb xabar beradi O‘zA.
Majlisda ta’kidlanganidek, O‘zbekiston Respublikasi Konstitutsiyasining 117-moddasiga muvofiq joriy yil dekabr oyi uchinchi o‘n kunligining birinchi yakshanbasida O‘zbekiston Respublikasi Oliy Majlisiga, xalq deputatlari viloyat, tuman va shahar Kengashlariga umumxalq saylovlari bo‘lib o‘tadi.
O‘zbekiston Respublikasining qonunchiligiga muvofiq Markaziy saylov komissiyasi Oliy Majlisga saylovni tashkil etadi va o‘tkazadi.
Yig‘ilishda 2014-yilda O‘zbekiston Respublikasi Oliy Majlisi, xalq deputatlari viloyat, tuman va shahar Kengashlari sayloviga tayyorgarlik ko‘rish va uni o‘tkazish bo‘yicha tadbirlar dasturi ko‘rib chiqildi.
Dastur saylov qonunchiligi qoidalarini saylovchilarga keng tushuntirish bo‘yicha axborot-tahlil ishlarini samarali tashkil etish uchun shart-sharoitlarni ta’minlash, milliy saylov tizimini yanada demokratlashtirishning mazmun-mohiyatini targ‘ib qilish, saylovchilarning bo‘lajak saylovga mamlakatimiz hayotidagi eng muhim ijtimoiy-siyosiy voqea sifatida tayyorgarlik ko‘rish va uni o‘tkazish jarayonidan xabardorligini oshirish, ularning huquqiy madaniyatini yuksaltirish bo‘yicha xalqaro, respublika va mintaqaviy tadbirlar o‘tkazishni nazarda tutadi.
Siyosiy partiyalarga, deputatlikka nomzodlarga o‘z saylovoldi dasturlarining qoidalarini, O‘zbekistonni ijtimoiy-siyosiy, sotsial-iqtisodiy rivojlantirishning dolzarb masalalari bo‘yicha ana shu dasturlarda o‘z ifodasini topgan pozitsiyalarini saylovchilarga, jamoatchilikka yetkazish uchun ommaviy axborot vositalaridan foydalanishda keng va teng imkoniyatlar yaratiladi.
2014-yilning aprel oyida davlat rahbari tashabbusi bilan qabul qilingan “O‘zbekiston Respublikasi Konstitutsiyasining ayrim moddalariga o‘zgartish va qo‘shimchalar kiritish to‘g‘risida (32, 78, 93, 98, 103 va 117-moddalariga)”gi qonunga muvofiq saylovga tayyorgarlik ko‘rish va uni o‘tkazishni davlat hokimiyatining boshqa qaysidir organlari aralashuvisiz ta’minlaydigan O‘zbekiston Respublikasi Markaziy saylov komissiyasiga konstitutsiyaviy organ maqomi berildi, uning faoliyat ko‘rsatish mexanizmi, faoliyatining mustaqillik, qonuniylik, kollegiallik, oshkoralik, adolatlilikdan iborat bo‘lgan asosiy prinsiplari belgilandi.
Majlisda muhokama natijalari bo‘yicha tegishli qaror qabul qilindi. O‘zbekiston Respublikasi Markaziy saylov komissiyasining vakolatiga taalluqli boshqa masalalar ham ko‘rib chiqildi.
Izoh (0)