O‘zbekiston futbol federatsiyasi anjumanlar zalida O‘zbekiston Professional futbol ligasi rahbariyati, Toshkent shahridagi Oliy liga futbol klublari vakillari va ushbu jamoalar muxlislar klublari hamda Ichki ishlar vazirligi xodimlari ishtirokida uchrashuv bo‘lib o‘tdi. O‘zPFL bosh direktori Farhod Magametov raislik qilgan uchrashuvda IIV Jinoyat qidiruv va terrorizmga qarshi kurash boshqarmasi boshlig‘i o‘rinbosari Nurbek Safarov va IIV Huquqbuzarliklarni oldini olish boshqarmasi bo‘lim boshlig‘i Islombek Jahongirov qatnashdi. Bu haqda O‘zbekiston futbol federatsiyasi sayti xabar berdi.
Muloqot chog‘ida Oliy liga bahslari doirasida Samarqand shahrida bo‘lib o‘tgan “Dinamo” (Samarqand)—“Paxtakor” (Toshkent) uchrashuvidan so‘ng ro‘y bergan noxush holatlarga to‘xtab o‘tildi (o‘yinda hakamning harakatidan norozi bo‘lgan samarqandlik futbol ishqibozlari janjal ko‘targan edi — “Daryo”). Hozirgi vaqtda hodisa yuzasidan surishtiruv ishlari davom etmoqda, tomonlarning ko‘rsatmalari o‘rganib chiqilmoqda. Qayd etishlaricha, ushbu noxush holatlar sabab hech kim jabr ko‘rmagan, biroq moddiy zararlar yetkazilgan. Bunday hodisalar kelajakda takrorlanmasligi kerakligi, buning oldini olish uchun muxlislar klublari bilan uchrashuvlarni ko‘proq tashkil etish va tushuntirish ishlari olib borish zarurligi ta’kidlandi.
Ayni vaqtda, yaqin xorij mamlakatlarida futbol muxlislarining siyosiy nizolarga aralashib qolishi holatlari yoki futbol muxlislarining bevosita aralashuvi bilan futbol uchrashuvlari atrofida turli tartibbuzarliklar amalga oshirilayotgani qayd etib o‘tildi. Uchrashuvda, shuningdek, O‘zbekistonda tashkil etilgan so‘nggi bir necha mahalliy va xalqaro uchrashuvlardagi futbol muxlislarining o‘zini tutishi va xulqi monitoring qilingani ma’lum qilinib, ushbu holat bo‘yicha tanqidiy munosabatlar bildirildi.
2013-yil fevralida Madaniyat va sport ishlari vazirligining buyrug‘i bilan Futbol bo‘yicha sport musobaqalarini o‘tkazish vaqtida tomoshabinlarning (muxlislarning) o‘zini tutish qoidalari tasdiqlangan bo‘lib, Nurbek Safarov o‘z nutqi davomida futbol klublari qoshida tashkil etilgan muxlislar klublari ushbu qoidalarda ko‘rsatilgan talablarga rioya etishlari kerakligi va ular stadiondagi boshqa tomoshabinlarga o‘zini tutish borasida namuna bo‘lishlari kerakligini qayd etib o‘tdi.
O‘z navbatida, IIV Huquqbuzarliklarni oldini olish boshqarmasi bo‘lim boshlig‘i Islombek Jahongirov futbol klublari qoshida tashkil etilgan muxlislar klublari a’zolari stadionlarda madaniyatli muxlislikni targ‘ib etishlari kerakligi haqida fikr bildirib, futbol uchrashuvlari vaqtida xavfsizlikni ta’minlashga mas’ul bo‘lganlar va muxlislar klublari o‘rtasidagi hamkorlikni yanada kuchaytirish zarurligini ta’kidladi.