O‘zbekiston Respublikasi Tashqi ishlar vazirligining Qabullar uyida mamlakatimizda akkreditatsiyadan o‘tgan diplomatik korpus va xorijiy tashkilotlar vakillari ishtirokida madaniy an’analar va milliy taomlar festivali bo‘lib o‘tdi, deb xabar berdi O‘zA.
– Mazkur festival turli xalqlar madaniyati va urf-odatlari bilan tanishish, hamkasblar bilan yaqindan muloqot qilish imkonini bermoqda, – dedi Shveysariyaning O‘zbekistondagi Favqulodda va muxtor elchisi Nikolya Bryul. – Festivalda elchixonamiz Shveysariya pishloqlari – kish va raklet, yong‘oq va bodomdan tayyorlangan shirinliklar bilan ishtirok etdi. Shveysariyada pishloq asosan qishda iste’mol qilinadi. O‘zbekistonda yilning istalgan faslida ushbu mahsulot tanovul qilinishi quvonarli. O‘zbek milliy taomlari, ayniqsa, viloyatlarda turlicha tayyorlanadigan palov tanovul qilishni juda yaxshi ko‘raman. Hech qayerda serquyosh o‘lkangizda yetishtiriladigandek mazali qovun va tarvuzni yemaganimni ham alohida ta’kidlab aytmoqchiman.
Tadbirda turli mamlakatlar xalqlarining madaniyati, urf-odatlari, qadriyat va an’analari, milliy liboslari, taomlari, hunarmandlik va amaliy san’at namunalari namoyish etildi. San’atkorlar ijrosida mumtoz va zamonaviy kuy-qo‘shiqlar yangradi.