Ukrainaning Donetsk va Lugansk viloyatlarida bugun, 11-may kuni ushbu hududlarning mustaqilligi to‘g‘risida referundum o‘tkazilmoqda. Shuningdek, Slavyansk shahrida ham ovoz berish uchastkalari mahalliy vaqt bilan ertalab soat 8:00 dan ochildi. Ukraina hukumati va G‘arb mamlakatlari referendumni qonuniy, deb tan olmayapti. Bu haqda Euronews xabar berdi.
10-maydan 11-mayga o‘tar kechasi va 11-may kuni ertalab Slavyansk atrofida o‘q tovushlari eshitilgan. Shahar Ukraina Qurolli kuchlari tomonidan qamal qilingan. Qurolli kuchlar vakillaridan ikkitasi jarohat olgan, deb xabar bermoqda mahalliy OAV.
Ukraina qo‘shinlari shaharni qurshab olishga harakat qilmoqda, deb tasdiqladi lugansklik ayirmachilar.
— Starobelsk tomonidan 30 ta BMP va 10 ga yaqin BTR mashinasi kelayotgani haqida ma’lumot bor. Kuchlar hamma tomondan Luganskka qarab tortilmoqda. Ukraina qo‘shinlarining ma’lum qilishicha, ular go‘yo chegaraga qarab harakat qilmoqda. Biroq ularning yo‘nalishidan aslida Luganskni qurshab olayotgani ko‘rinib turibdi, — deydi Lugansk viloyatining “Xalq gubernatori” Valeriy Bolotov.
Chorshanba, 7-may kuni Rossiya prezidenti Vladimir Putin Kiyev hukumati bilan dialog o‘rnatishga zarur sharoitlarni yaratish uchun ovoz berishni qoldirishni taklif qilgan edi. Ammo Donetsk va Luganskda referendum o‘tkazishga qaror qilindi.
Ovoz berish natijalari dushanba, 12-may kuni e’lon qilinishi kutilmoqda.
Izoh (0)