O‘zbekiston Respublikasi Prezidenti Islom Karimov 9-may – Xotira va qadrlash kunida Toshkentdagi Xotira maydoniga tashrif buyurdi, deb xabar berdi O‘zA. Davlat rahbari harbiy orkestr sadolari ostida Motamsaro ona haykali poyiga gulchambar qo‘ydi.
Prezident Ikkinchi jahon urushida jon fido qilgan yurtdoshlarimiz xotirasiga hurmat bajo keltirdi.
– Bugun barcha vatandoshlarimiz, butun xalqimiz Xotira va qadrlash kuni deb nom olgan ulug‘ ayyomni, fashizm ustidan qozonilgan G‘alabaning 69-yilligini keng nishonlamoqda, – dedi Islom Karimov ommaviy axborot vositalari vakillari bilan suhbatda. – Shu kunlarda barchamiz o‘z insoniy burchimizni ado etib, bugungi tinch hayotimiz uchun, musaffo osmonimiz uchun jang maydonlarida jon berib urushdan qaytmaganlarni eslaymiz, ularning arvohlarini shod etib, o‘chmas xotirasi oldida bosh egamiz.
Bugun oramizda sog‘-salomat hayot kechirayotgan, barchamiz uchun aziz va muhtaram bo‘lgan nuroniy otaxon va onaxonlarimizga, urushda qatnashgan mardlarga, shu bilan birga, front ortida mehnat qilib, G‘alaba kunini yaqinlashtirishga munosib hissa qo‘shgan yurtdoshlarimizga chin qalbimdan hurmatimni bildiraman va ularga o‘z nomimdan, butun xalqimiz nomidan bardamlik, uzoq umr, baxtli hayot tilayman, dedi davlat rahbari.
Prezident kishilik tarixidagi eng qonli, eng katta yo‘qotish va mislsiz qurbonlarga, el-yurtimiz o‘rtasida qancha-qancha musibat va ofatlar, g‘am-alamlarga, beva-bechoralar va yetimlarning paydo bo‘lishiga sabab bo‘lgan beshafqat urush tugaganiga deyarli 70-yil to‘lgan bo‘lsa-da, mash’um urushni esidan, xayolidan chiqargan birorta ham xonadon yo‘qligini qayd etdi.
“O‘ylaymanki, bu borada ba’zi bir raqamlarni takror va takror esimizga olishimiz, bolalarimizga, yosh avlodimizga yetkazib turish uchun ularni doimo xotiramizda saqlashimiz darkor”, — deb ta’kidladi davlat rahbari.
Agar urushdan oldin O‘zbekistonda 6,5 millionga yaqin aholi yashagan bo‘lsa, shundan 1,5 milliondan ko‘prog‘i janglarda qatnashgan. Yoki o‘sha paytdagi xalqimizning taxminan uchdan bir qismi qo‘liga qurol olib, jangu jadallarda ishtirok etgan, qonini to‘kkan.
O‘sha yovuz urushda 500 mingga yaqin yurtdoshlarimiz halok bo‘lgan, qancha odam bedarak ketgan, qancha-qancha insonlar mayib-majruh bo‘lib qaytgan.
“Shuning uchun ham urushda halok bo‘lganlarning, urushdan qaytmaganlarning nomlarini poytaxt markazida va joylarda barpo etilgan Xotira maydonlarida oltin harflar bilan muhrlab qo‘yib, bundan 16-yil oldin 9-may sanasiga Xotira va qadrlash kuni deb nom berganimiz naqadar to‘g‘ri bo‘lganini bugun hayotning o‘zi yana bir bor tasdiqlab bermoqda”, — deya e’tirof etdi Islom Karimov.
Prezident urush hech qachon qaytarilmasligi uchun bunday fojia va balolarning oldini olish, doimo ogoh va hushyor bo‘lish zarurligini ta’kidladi.
Afsuski, bugungi kunda dunyoning turli hudud va mintaqalarida, olis va yaqin atrofimizda qarama-qarshilik va ziddiyatlar tobora kuchayib borayotganini ko‘rmoqdamiz.
Bunday tahlikali vaziyatda bizning yondashuvimiz va qarashlarimiz Birlashgan Millatlar Tashkilotining Nizomida, xalqaro huquqiy normalarda belgilab, muhrlab qo‘yilgan asosiy prinsiplarni so‘zsiz bajarishdir, zo‘ravonlikka, kuch ishlatishga yo‘l qo‘ymaslikdir.
Yuzaga keladigan qarama-qarshiliklarni, nizolarni faqat siyosiy yo‘l, tinch vositalar bilan hal etish lozim, davlatlarning siyosiy suvereniteti va chegaralari daxlsizligining buzilishiga yo‘l qo‘ymaslik zarur. Bu bizning qat’iy siyosatimizdir, dedi davlat rahbari.
So‘zimning nihoyasida muhtaram faxriylarimizni, butun xalqimizni bugungi qutlug‘ bayram bilan yana bir bor tabriklab, barcha-barchangizga uzoq umr, sihat-salomatlik, xonadonlaringizga fayzu baraka tilayman, dedi Prezident Islom Karimov.
Shu kuni Motamsaro ona haykali poyi gullarga burkandi. Xotira maydoni oqshomga qadar yurt tinchligi va ozodligi, avlodlarning porloq istiqboli uchun jonini fido qilgan vatandoshlarimiz xotirasiga hurmat bajo etish uchun kelgan ziyoratchilar bilan gavjum bo‘ldi.
Izoh (0)