O‘zbekiston Kasaba uyushmalari federatsiyasi kengashi tomonidan poytaxtdagi Urush va mehnat faxriylari respublika pansionatida “Kasaba uyushmalari – faxriylarga” aksiyasi doirasida bayram dasturi tashkil etildi, deb xabar berdi O‘zA.
Tadbir Prezident Islom Karimovning 2014-yil 18-apreldagi “Ikkinchi jahon urushi qatnashchilarini rag‘batlantirish to‘g‘risida”gi farmoni asosida o‘tkazildi.
Urush va mehnat faxriylari respublika pansionatida o‘tkazilgan tadbirda nuroniy otaxon va onaxonlar uchun dasturxon yozildi. Taniqli san’atkorlar ijrosidagi kuy-qo‘shiqlar ishtirokchilarga bayramona kayfiyat bag‘ishladi.
“Kasaba uyushmalari – faxriylarga” aksiyasi davomida mamlakatning turli hududlarida istiqomat qilayotgan Ikkinchi jahon urushi qatnashchilariga kasaba uyushmalari tomonidan yordam ko‘rsatildi. Bayram arafasida kasaba uyushmalari tizimidagi kapital ta’mirlanib, foydalanishga topshirilgan sanatoriylarning ilk dam oluvchilari ham urush va mehnat faxriylari bo‘ldi. Xususan, 60 nafar urush qatnashchisiga “Oqtosh”, “Turon”, “Chortoq”, “Chinobod”, “Botanika”, “Bo‘ston”, “Zomin”, “Kosonsoy” kabi sanatoriylarga bepul yo‘llanmalar berildi. Ushbu sihatgohlarda faxriylarning mazmunli hordiq chiqarib, salomatligini mustahkamlashi uchun barcha shart-sharoit yaratilgan. Yangidan barpo etilgan ma’danli suv galereyasi, amfiteatr, fitomajmua, kapital ta’mirdan chiqarilgan davolash majmui va fizioterapiya bo‘limlarida malakali shifokorlar otaxonu onaxonlarga beminnat xizmat ko‘rsatmoqda.
Shu bilan birga, kasaba uyushma faollari tashkilotchiligida 300 nafarga yaqin urush va mehnat faxriysining yurtimizdagi tarixiy shaharlarga sayohatlari uyushtirildi. Xizmat burchini o‘tash davrida halok bo‘lgan 182 nafar Vatan himoyachisi oilasi holidan xabar olinib, zarur yordam ko‘rsatildi.
Kasaba uyushmalari faollari fidoyi insonlar xonadonlariga tashrif buyurib, sovg‘alar ulashmoqda.
Izoh (0)