Poytaxtdagi 38-bolalar va o‘smirlar sport maktabida sportchi qizlarga milliy va zamonaviy uslublar asosida tayyorlangan sport kiyimlarini topshirish marosimi bo‘lib o‘tdi. Bu haqda O‘zA xabar berdi.
O‘zbekiston Bolalar sportini rivojlantirish jamg‘armasi tomonidan Toshkentdagi 11 ming 300 nafar qizga sport kiyimlari topshirildi.
– Ko‘rkam sport liboslarining taqdim etilishi Prezident tomonidan qizlarni sportga keng jalb etish, ularning har tomonlama sog‘lom bo‘lib voyaga yetishini ta’minlashga qaratilayotgan yuksak e’tiborning yorqin namunasidir, – deydi Yakkasaroy tumanidagi 13-ixtisoslashgan bolalar va o‘smirlar olimpiya zaxiralari sport maktabi uslubchisi Maqsuda Xalilova. – Bu liboslar farzandlarimizning sportga bo‘lgan ishtiyoqini yanada oshirishga xizmat qiladi.
Mutaxassislarning tavsiyasi asosida tayyorlangan bu liboslar yuqori sifatli, O‘zbekiston iqlim sharoitiga mos va qulayligi bilan ajralib turadi.
Tadbirda sportchi yoshlarning ko‘rgazmali chiqishlari namoyish etildi. Yosh ijrochilarning konsert dasturi barchaga xushnudlik bag‘ishladi.
Ta’kidlash joiz, 2013-yilda Toshkent shahrida ikkita bolalar sport majmuasi, ikkita bolalar va o‘smirlar sport maktabi, bitta suzish havzasi hamda beshta bolalar musiqa va san’at maktabi foydalanishga topshirildi. Ayni paytda mavjud sport majmualarida 184 ming nafardan ziyod o‘g‘il-qiz sport mashg‘ulotlariga jalb etilgan. Ularning 78 ming nafardan ortig‘i qizlardir.
Izoh (0)