Qozog‘iston Prezidenti “Qozog‘iston Respublikasi va O‘zbekiston Respublikasi o‘rtasida strategik hamkorlik haqidagi bitimni ratifikatsiya qilish to‘g‘risida”gi qonunni imzoladi. Bu haqda Qozog‘iston Prezidenti matbuot xizmatiga asoslanib Anhor.uz sayti xabar qildi.
Bitimga asosan, tomonlar o‘zaro harbiy, harbiy-texnikaviy va fuqarolik mudofaasi sohalarida hamkorlik qiladi. Shuningdek, fan va texnika, sog‘liqni saqlash, ta’lim va madaniyat, turizm va sport sohalaridagi hamkorlikka ham katta ahamiyat qaratiladi. Bitim shartlariga ko‘ra, tomonlar o‘z munosabatlarini tenglik, o‘zaro ishonch, strategik hamkorlik asosida barpo qiladi.
Agar har ikki tomonning yoki tomonlardan birining xavfsizligiga salbiy ta’sir ko‘rsatuvchi holat yuzaga kelsa, tomonlar o‘zaro kelishuv asosida bunday holatlarni bartaraf qilish va muvofiqlashtirish choralarini ko‘rib chiqadi.
Ushbu bitim O‘zbekiston va Qozog‘istonning harbiy-texnikaviy hamkorligi, shuningdek, FVV kuchlarinining o‘zaro hamkorligi, transport va kommunikatsiya sohalari, neft va gaz sohalaridagi masalalarni hal qilish imkonini beradi. Bundan tashqari, ikki davlat o‘rtasidagi savdo imkoniyatlarini kengaytirishga ham yordam qiladi.
Izoh (0)