Gaiti janubida sodir bo‘lgan yo‘l-transport hodisasi natijasida 23 kishi halok bo‘ldi. Reuters axborotiga ko‘ra, yana 17 kishi turli darajada tan jarohati olgan, deb yozadi “Kun” nashri.
Halokat 3-may, shanba kuni oqshomda qirg‘oq bo‘yidagi Rozo shahrida sodir bo‘lgan. Bozordan haddan tashqari ko‘p yo‘lovchi va ularning yuklarini olib ketayotgan yuk mashinasi katta yo‘lda ag‘darilib ketgan.
Hodisa natijasida olti kishi shu zahoti halok bo‘lgan, ularning ba’zilari yuklar ostida qolib ketgani aytilmoqda. Yana 17 kishi shifoxonada vafot etgan.
Omon qolganlar ko‘pchiligining ahvoli og‘ir ekanligi xabar qilinmoqda. Qo‘shni Jeremi shahri meri Ronald Etenning so‘zlariga ko‘ra, avariya sabablari hozircha aniqlangani yo‘q.
Gaiti yo‘l sifati pastligi bo‘yicha Ruminiya, Moldova va Mo‘g‘uliston bilan birgalikda, jahondagi eng pastki o‘rinlardan birida turadi. Yo‘l qoplamasining qoniqarsiz ekanligidan tashqari, haydovchilik madaniyatining pastligi va ko‘plab avtomobillarning nosoz ahvoldaligi ham avtohalokatlarga sabab bo‘ladi.
Izoh (0)