Rossiyaning sanksiyalarga javob choralari g‘arb kompaniyalariga katta zarar keltirishi mumkin

Rossiya prezidenti Vladimir Putin G‘arb sanksiyalariga javob choralarini ko‘rish ehtimoli haqida bayonot berdi. Bu “iqtisodiy urush” boshlanishiga zamin yaratadi, bunday urush AQSh va Yevroittifoq kompaniyalariga qattiq ta’sir ko‘rsatishi mumkin. Bu haqda Bloomberg nashri ma’lumotiga tayanib, “RIA Novosti” xabar berdi.

Putin Rossiyaning bunday javob choralarini ko‘rishni xohlamasligini aytgan bo‘lsa-da, kelajakda bunday ehtimol yuzaga kelishini ham qo‘shimcha qildi. Buning natijasida xorijiy investorlar neft qazib chiqarish sohasida milliardlab dollar yo‘qotishi mumkin.

Ayniqsa, Rosneft bilan yirik loyihalarni amalga oshirayotgan AQShning ExxonMobile kompaniyasi bunday javob choralaridan ehtiyot bo‘lishi zarur, deyiladi nashr xabarida.

Ma’lum bo‘lishicha, AQSh va Yevropaning olti nafar mansabdor shaxslari, Putin javob choralarini ko‘rgan taqdirda o‘z mamlakatlari iqtisodiyoti va kompaniyalari uchun potensial risklarni o‘rganmoqda.