O‘zbekiston avtomobil va daryo transporti agentligining 2014-yil birinchi choragida amalga oshirilgan ishlar, sohada erishilgan yutuqlar hamda istiqboldagi vazifalariga bag‘ishlangan matbuot anjumani bo‘lib o‘tdi, deb xabar beradi O‘zA.
Avtomobil transporti xizmatlari bozorida raqobat muhitini kuchaytirish maqsadida yo‘lovchi tashish yo‘nalishlari ochiq tender tanlovlari orqali amalga oshirilmoqda. Jumladan, joriy yilning o‘tgan davrida 27 tender o‘tkazilib, yo‘lovchi tashish bo‘yicha 225 yo‘nalish joylashtirildi. Agentlik va uning hududiy bo‘limlari tomonidan xo‘jalik yurituvchi subyektlarga 727 litsenziya va 44 700 ga yaqin litsenziya varaqasi berildi.
Tizimda yo‘l harakati xavfsizligi xizmati va davlat soliq organlari bilan muntazam hamkorlik o‘rnatilgan. Mazkur tashkilotlar bilan birgalikda o‘tkazilgan mingdan ortiq qo‘shma reyd davomida 16 693 holatda avtotransport egalarining litsenziyalash sohasida qonunbuzilishlarga yo‘l qo‘ygani aniqlandi. Natijada litsenziyasiz faoliyat ko‘rsatgan shaxslarga nisbatan 2 milliard 548 million so‘m miqdorida jarimalar qo‘llanildi.
Ma’lumotlarga ko‘ra, hozirgi kunda avtotransport tizimida 4300 dan ortiq yo‘lovchi tashish yo‘nalishi faoliyat ko‘rsatmoqda. Mazkur yo‘nalishlarning 1000 dan ortig‘i shahar, 2700 ga yaqini shahar atrofi va 640 dan ziyodi shaharlararo yo‘nalishlardir.
Yanvar—mart oylarida Farg‘ona viloyatida 82, Toshkent viloyatida 13 va Navoiy viloyatida to‘rt Isuzu rusumli avtobus lizing asosida xarid qilinib, shahar va shahar atrofi yo‘nalishlariga yo‘lovchi tashish uchun qo‘yildi.
Agentlikda daryo transportini hisobga olish, klassifikatsiyalash, texnik holatini nazorat qilish va belgilangan muddatlarda texnik ko‘rikdan o‘tkazish maqsadida 10 korxona bilan o‘zaro shartnomalar tuzildi.
Izoh (0)