Toshkent axborot texnologiyalari universiteti Samarqand filialida bo‘sh ish o‘rinlari yarmarkasi o‘tkazildi, deb xabar bermoqda O‘zA.
Samarqand shahar hokimligi, bandlikka ko‘maklashish va aholini ijtimoiy muhofaza qilish markazi hamda “Kamolot” yoshlar ijtimoiy harakati shahar kengashi hamkorligida tashkil etilgan tadbirda 80 ga yaqin korxona va tashkilot 800 dan ortiq bo‘sh va kvota ish o‘rinlari bilan qatnashdi.
– O‘tgan yili Alisher Navoiy nomidagi Samarqand davlat universitetini psixolog mutaxassisligi bo‘yicha bitirganman, – deydi Dilnoza Nazarova. – Bugungi mehnat yarmarkasida taklif etilgan ish o‘rinlari bilan tanishib, shahardagi 115-maktabgacha ta’lim muassasasiga pedagog-psixolog sifatida ishga yo‘llanma oldim.
Yarmarkada 40 nafarga yaqin fuqaro ishga joylashish imkoniyatiga ega bo‘ldi.
O‘zA ma’lumotiga ko‘ra, Andijon viloyati Asaka tumani madaniyat va istirohat bog‘ida tuman hokimligi, prokuraturasi, ichki ishlar bo‘limi hamda bandlikka ko‘maklashish va aholini ijtimoiy muhofaza qilish markazi hamkorligida ham bo‘sh ish o‘rinlari yarmarkasi o‘tkazildi.
Yarmarkada tumandagi 106 korxona, tashkilot, muassasa va fermer xo‘jaliklari 310 bo‘sh ish o‘rni bilan ishtirok etdi.
– Joriy yilning dastlabki choragida tumanda 1 ming 953 yangi ish o‘rni yaratildi, – deydi tuman bandlikka ko‘maklashish va aholini ijtimoiy muhofaza qilish markazi rahbari Sanjarbek Alioxunov. – Navbatdagi mehnat yarmarkasida asosan uyda o‘tirgan xotin-qizlar va kasb-hunar kolleji bitiruvchilariga ishga joylashish uchun yo‘llanma berildi.
– Men Asaka avtomobilsozlik kasb-hunar kollejini bitirganman, – deydi Sabriddin Shamshiddinov. – Yarmarkada o‘z mutaxassisligim bo‘yicha “O‘z Dong Vong Ko” O‘zbekiston-Koreya qo‘shma korxonasiga yo‘llanma oldim.
Izoh (0)