Qoraqalpog‘istondagi 42 mlrd so‘mlik ko‘prik mustaqillik arafasida foydalanishga topshiriladi

Ayni paytda G‘arbu sharqni bir-biriga bog‘lovchi G‘uzor—Buxoro—Nukus—Beynov avtomobil yo‘lining qurilishi jadal olib borilmoqda. Xalqaro avtomagistralning 652 kilometri Qoraqalpog‘iston Respublikasi hududidan o‘tadi. Bu avtotrassa qurilishida Taxiatosh shahridagi ko‘prik xo‘jaligini saqlashga ixtisoslashtirilgan ta’mirlash-foydalanish korxonasi ham faol ishtirok etmoqda, deb yozadi O‘zA.

– Hozir A-380 avtomagistralining 753—765 kilometr uchastkasida rekonstruksiya ishlari olib bormoqdamiz, – deydi korxona rahbari Rashid Jo‘ldasov. – Bunga qo‘shimcha avtomagistralning Nukus—Chimboy—Taxtako‘pir yo‘li bilan kesishadigan joyida zamonaviy ko‘prik qurish ishlarini o‘tgan yili noyabr oyida boshlagan edik. Bu yerda 42 milliard 480 million so‘mlik qurilish ishlarini bajarib, inshootni Vatanimiz mustaqilligining 23-yilligi bayrami arafasida foydalanishga topshiramiz.

Qurilish ishlariga ekskavator, greyder, samosval, kran, asfalt yotqizish mashinasi singari 60 ga yaqin texnika jalb etilgan.

– Yigirma besh yildan buyon yo‘l qurilishida ishlayman, – deydi avtogreyderchi Zarif Nurabullayev. – Biz qurayotgan inshoot avtomobillarning xavfsiz qatnovini ta’minlabgina qolmay, Nukus shahriga o‘ziga xos ko‘rk bag‘ishlashini o‘ylasam, qilayotgan ishimdan g‘ururlanib ketaman.

Ko‘prikka olib chiqadigan to‘rt tomondan aylanma yo‘l qurilishi ham jadal davom ettirilmoqda.