Toshkentda O‘zbekiston Respublikasi bilan Koreya Respublikasi o‘rtasidagi hamkorlik istiqbollariga bag‘ishlangan forum bo‘lib o‘tdi. Bu haqda O‘zA xabar berdi.
Tadbirda ikki mamlakatning iqtisodiyot, yoqilg‘i-energetika, savdo-sarmoya, avtomobilsozlik, transport, qishloq va suv xo‘jaligi, aviatashuv, bojxona, eksport-import, sug‘urta va logistika kabi sohalari uchun mas’ul vazirlik va idoralari, kompaniyalari rahbarlari, ilmiy-tadqiqot va ta’lim muassasalari vakillari ishtirok etdi.
Koreya Respublikasi O‘zbekistonning eng yirik sarmoyaviy sheriklaridan biri. Mazkur mamlakatning O‘zbekistonga kiritgan jami sarmoyasi 6 milliard AQSh dollaridan oshdi.
Mamlakatlar o‘rtasidagi munosabatlarning shartnomaviy-huquqiy asosini tashkil etuvchi 230 dan ziyod hujjat imzolangan.
2013-yilda o‘zaro tovar ayirboshlash hajmi 2,1 milliard AQSh dollaridan oshdi. Bugungi kunda O‘zbekistonda janubiy koreyalik ishbilarmonlar bilan tashkil etilgan qariyb 420 qo‘shma korxona faoliyat ko‘rsatmoqda. Mamlakatimizda Janubiy Koreyaning saksonga yaqin kompaniyasi o‘z vakolatxonasini ochgan. Ular savdo, to‘qimachilik va yengil sanoat, tog‘-kon metallurgiyasi, kimyo va oziq-ovqat sanoati, mashinasozlik, metallni qayta ishlash, sayyohlik, sog‘liqni saqlash, transport xizmati ko‘rsatish kabi sohalarda ish yuritadi.
– Koreya Respublikasi Prezidenti Pak Kin Xe Yevroosiyo mintaqasidagi mamlakatlarning o‘zaro hamkorligini yanada rivojlantirish tashabbusini ilgari surdi, – dedi An Se Yon. – O‘zbekiston Janubiy Koreyaning ushbu mintaqadagi asosiy sheriklaridan biridir. Mazkur forum mamlakatlarimizning turli sohalarda faoliyat yurituvchi tadqiqot muassasalari vakillariga davlatlarimiz o‘rtasidagi hamkorlikning yangi istiqbollari haqida fikr almashish imkonini berdi. Bu o‘zaro manfaatli hamkorligimizni yanada taraqqiy ettirishga xizmat qiladi.
Izoh (0)