Toshkentda O‘zbekiston Respublikasi Tashqi iqtisodiy aloqalar, investitsiyalar va savdo vazirligi huzuridagi “O‘zinfoinvest” agentligi tomonidan tashkil etilgan O‘zbekiston–Chili biznes seminari bo‘lib o‘tdi. Bu haqda O‘zA xabar bermoqda.
O‘zbekistonning xorijiy hamkor mamlakatlar, jumladan, Chili Respublikasi bilan tashqi iqtisodiy aloqalari kengayib bormoqda. Masalan, 2014-yilda ikki mamlakat o‘rtasidagi umumiy tovar ayirboshlash hajmi 2012-yilga nisbatan uch baravardan ziyod oshdi. Chunonchi, O‘zbekiston Chiliga yengil sanoat mahsulotlari eksport qilmoqda, mamlakatimizga kelayotgan chililik sayyohlar soni ko‘paymoqda.
Tadbirda ishtirok etgan O‘zbekiston sanoat kompaniyalari vakillari Chili iqtisodiyoti, xususan, ushbu davlatning import ehtiyojlariga oid zarur ma’lumotlarga ega bo‘ldi. Chili vakillari O‘zbekistonning iqtisodiy salohiyati va investitsion muhiti, milliy mahsulotlar eksportining ustuvor yo‘nalishlari to‘g‘risidagi taqdimotlar bilan tanishdi.
– O‘zbekiston va Chili o‘rtasidagi iqtisodiy munosabatlar katta istiqbolga ega, – deydi qarorgohi Moskvada joylashgan Chili Respublikasining O‘zbekiston Respublikasidagi Favqulodda va Muxtor elchisi Xuan Eduardo Egiguren Gusman. – Bugungi seminarda O‘zbekistonda yaratilgan qulay investitsion muhit haqida ko‘plab ma’lumotlarga ega bo‘ldik. O‘zbekistonlik sanoatchilar va tadbirkorlarni Chilining iqtisodiy imkoniyatlari bilan tanishtirdik. Tez orada O‘zbekistonda o‘z savdo vakolatxonamizni tashkil etamiz va Chili tadbirkorlarini o‘zbekistonlik sheriklar bilan hamkorlikka jalb qilamiz.
Izoh (0)