Dushanba kuni sharqiy Xitoyning Futszyan provinsiyasidagi Sinkou shahrida harakatlanayotgan haydovchi yo‘lovchi va velosipedchilarni ataylab urib ketdi. Natijada olti kishi halok bo‘ldi, 13 kishi jarohat oldi. Qurbonlar orasida uchta yosh bola bor. Bu haqda mahalliy OAVlarga tayanib “ITAR-TASS” xabar berdi.
Politsiyaning dastlabki taxminiga ko‘ra, Lin familiyali jinoyatchining bunday harakatiga oilasidagi muammolar tufayli yuzaga kelgan beqaror hissiy holati sabab bo‘lgan. Ma’lum bo‘lishicha, xotinining ajrim haqidagi shikoyati ko‘rilayotgan sud binosidan chiqqan Lin avtomobil tezligini oshirgan va goh-gohida trotuarga o‘tib, yo‘lovchilarni urib keta boshlagan. Shu tariqa u avtomobili olgan ziyonlar natijasida to‘xtab qolmagunicha, ikki kilometrcha masofani bosib o‘tgan.
Lin voqea joyiga yetib kelgan politsiyaga taslim bo‘lishdan bosh tortgan hamda mashinasidagi benzin va pirotexnika solingan idishni yoqib yuborish bilan tahdid qilgan. Jinoyatchini chalg‘itib, portlovchi moddalarni olib qo‘yishdi, haydovchini esa hibsga olishdi.
Izoh (0)