Amerikaning San-Antonio shahri (Texas shtati) politsiyasi dushanba kuni 17 yoshli o‘smirni hibsga oldi. Bunga o‘smirning maktabga avtomat va ikkita to‘pponcha olib kelgani sabab bo‘ldi. Mahalliy OAVlarning xabar berishicha, qurollarning barchasi o‘qlangan bo‘lgan.
“ITAR-TASS” yozishicha, bolaning ota-onasi uydan qurollarning yo‘qolganini sezib qolgan va o‘g‘illarining maktabiga kelgan. Yigitni darsdan chaqirib olib, ryukzagini tekshirib ko‘rishganida, to‘pponchalar, ularning o‘qlari va pichoq topilgan. Avtomat esa maktabdagi hojatxonalardan biriga yashirib qo‘yilgan.
Maktab rahbariyatining guvohlik berishicha, o‘smir bola ovozni kuchaytiradigan karnay yordamida o‘qituvchi va o‘quvchilarga murojaat qilib o‘zining ba’zi talablarini e’lon qilishini, ular bajarilmasa, zo‘ravonlikni amalga oshirishini aytgan. Gap aynan qanday talablar haqida ketayotganiga aniqlik kiritmagan. Ma’lum bo‘lishicha, yigit o‘qituvchilardan biridan xafa bo‘lgan.
Hodisa natijasida hech kimga ziyon yetmagan. O‘smirga maktab hududida qurol olib yurish ayblovi qo‘yilgan.
Izoh (0)