Toshkentda VII Innovatsion g‘oyalar, texnologiyalar va loyihalar respublika yarmarkasi yakunlandi, deb xabar berdi O‘zA.
O‘zbekiston olimlari va mutaxassislari tomonidan yaratilgan yangiliklarni joriy etish borasida qiymati qariyb 14,1 milliard so‘mlik 320 dan ortiq shartnomalar tuzildi. Bu 23—25-aprel kunlari poytaxtimizdagi “O‘zekspomarkaz”da bo‘lib o‘tgan yarmarkaning dastlabki natijalaridir.
2014-yilgi yarmarka 1,5 mingdan ziyod ishtirokchi – vazirliklar, idoralar, bank sektori, iqtisodiyotning barcha tarmoqlari korxonalari, jumladan, kichik biznes va xususiy tadbirkorlik, fermer xo‘jaliklari, Fanlar akademiyasining ilmiy-tadqiqot institutlari, oliy ta’lim muassasalari vakillari, shuningdek, alohida ixtirochilarni birlashtirdi. Sanoat, qishloq xo‘jaligi, tibbiyot va farmakologiya, axborot-kommunikatsiya texnologiyalari, fan va ta’lim sohalarini rivojlantirishga yo‘naltirilgan qariyb 500 ishlanma, innovatsion g‘oya va loyihalar namoyish etildi.
“O‘zbekneftgaz” milliy xolding kompaniyasi korxonalari O‘zbekiston Respublikasi Fanlar akademiyasi institutlari va oliy o‘quv yurtlari bilan yangi texnologiyalarni joriy etish bo‘yicha bir necha milliard so‘mlik shartnomalar imzoladi. Xususan, O‘zbekiston Respublikasi Fanlar akademiyasining Umumiy va noorganik kimyo instituti “Farg‘ona neftni qayta ishlash zavodi” unitar sho‘ba korxonasi uchun uglevodorodli bug‘lanadigan omilni qo‘llash orqali neft-gaz kondensati aralashmasini ratifikatsiyalashning sanoat sinovi va ilmiy-texnika hujjatlarini ishlab chiqish bilan shug‘ullanadi. Mikrobiologiya instituti “Muborak gazni qayta ishlash zavodi” unitar sho‘ba korxonasi bilan hamkorlikda neft mahsulotlari va tuproqni tozalashning ekologik toza biotexnologiyasini sinovdan o‘tkazadi.
Yarmarkada Abu Rayhon Beruniy nomidagi Toshkent davlat texnika universiteti bilan umumiy qiymati 1,2 milliard so‘mlik 15 shartnoma va kelishuv imzolandi. Universitetning innovatsion mahsulotlariga buyurtma berganlar orasida “O‘zelektrtarmoq” unitar korxonasi, “O‘zmetkombinat” ochiq aksiyadorlik jamiyati, “Surxon parmalash ishlari” mas’uliyati cheklangan jamiyati, fermer xo‘jaliklari va boshqalar mavjud.
– Innovatsiyalar yarmarkasidagi ishtirokimizdan ko‘nglimiz to‘ldi, – deydi Sabzavot, poliz ekinlari va kartoshkachilik ilmiy-tadqiqot institutining o‘simliklarni himoya qilish laboratoriyasi boshlig‘i Mirxalil Xoldorov. – Yarmarkada 4 innovatsion ishlanmani namoyish etdik. Ular qovun kasalliklari va zararkunandalariga qarshi kurashish, sabzavot va poliz ekinlarini o‘stirishda qora plyonka va tomchilatib sug‘orish usulidan foydalanish, kartoshka yetishtirishda mikrobiologik o‘g‘itlarni qo‘llash, sabzavot ekinlari ko‘chatlarini maxsus kassetalarda o‘stirishga yo‘naltirilgan. Qishloq xo‘jaligini rivojlantirishga yordam beradigan ushbu innovatsion texnologiyalarga, ayniqsa, fermerlar ko‘proq qiziqish bildirdi.
Yarmarka ishtirokchilari mamlakatimizda innovatsion iqtisodiyotni shakllantirishning dolzarb masalalarini muhokama qildi. Yarmarka doirasida innovatsion faoliyatni axborot bilan ta’minlashni takomillashtirish masalalariga bag‘ishlangan seminar bo‘lib o‘tdi. Shuningdek, o‘tkazilgan davra suhbatlarida muqobil energetikani rivojlantirish istiqbollari va yosh olimlar hamda talabalarni innovatsion faoliyatga jalb etishni kengaytirish masalalari muhokama qilindi.
Izoh (0)