O‘zbekistonda Click foydalanuvchilari soni 200 mingdan oshdi
Click kompaniyasi foydalanuvchilari soni 200 ming kishidan oshdi. Kompaniya matbuot xizmati xabariga ko‘ra, so‘nggi ikki oyning o‘zida foydalanuvchilar soni 100 mingdan ko‘proq kishiga ortgan.
“Foydalanuvchilar sonining jadal suratlarda o‘sishi kompaniyaning qabul qilingan rivojlanish strategiyasining natijasidir. Ushbu strategiya tizim foydalanuvchilariga o‘z hisob raqamlarini va plastik kartochkalarini boshqarishda maksimal darajada qulayliklar yaratishni, kundalik hayotlarida turli to‘lovlar o‘tkazishda keng imkoniyatlar ochishni ko‘zda tutadi”, – deyiladi kompaniyaning 25-aprel kuni bergan xabarida.
Tizim foydalanuvchisi mobil telefon (USSD portali yoki SMS yordamida) yoki internet orqali uyali aloqa operatorlari, internet-provayderlar xizmatlari uchun to‘lovlarni amalga oshirish, boshqa jimsoniy shaxslarga, savdo-servis korxonalariga (supermarket, restoran va kinoteatrlarda to‘lovlar) pul mablag‘larini o‘tkazish, bevosita o‘z bank hisoblaridan internet-magazinlardan onlayn-xaridlarni amalga oshirish, shuningdek, turli tadbirlarga chiptalar sotib olish imkoniyatiga ega.
“Yaqin vaqt ichida mobil telefonlar, maishiy elektronikasi, oziq-ovqat va kundalik turmushda kerak bo‘ladigan boshqa mahsulotlar bilan savdo qiluvchi turli do‘konlarni tarmoqqa ulashni rejalashtiryapmiz”, – deydi Click kompaniyasi direktori Ulug‘bek Rustamov Gazeta.uz’ga bergan intervyusida.
“Kun”ning ma’lum qilishicha, bosh hamkori UzCard tarmog‘i bo‘lgan Click hozirgi kunda banklar, mobil operatorlar, “O‘zbektelekom” filiallari, internet-provayderlar, xususiy televideniye, internet-servis provayderlar, kommunal xizmat, savdo-xizmat tashkilotlari bilan hamkorlik qilmoqda.
Hozirgi vaqtda Click hamkori bo‘lgan 40 ga yaqin kompaniyalarning xizmatlariga onlayn to‘lovlarni amalga oshirish imkoni mavjud. Ba’zi onlayn-do‘konlarda Click orqali xaridlar amalga oshirilganida, chegirmalar taqdim etiladi. Qayd etish joiz, kompaniya o‘z faoliyatini 2011-yilda boshlagan.
