“Kamolot” YoIH milliy internet tanlovi boshlanganini e’lon qildi

“Kamolot” yoshlar ijtimoiy harakati qator vazirlik va tashkilotlar bilan hamkorlikda MIT.uz. II milliy internet tanlovi boshlanganini e’lon qildi. Tanlovdan ko‘zlangan maqsad – yoshlar uchun yangi internet resurslar yaratish va mavjudlarini yanada rivojlantirishdan iborat, deb xabar bermoqda O‘zA.

“Kamolot” yoshlar ijtimoiy harakati markaziy kengashidan ma’lum qilishlaricha, bu yilgi tanlov 10 ta asosiy va to‘rtta qo‘shimcha yo‘nalishlar bo‘yicha bo‘lib o‘tadi. Unda 14 yoshdan 30 yoshgacha bo‘lgan veb-dizaynerlar, dasturchilar, internet saytlari mualliflari, fotomuxbirlar, jurnalistlar va yosh ijodkorlar o‘z saytlari, internetga joylashtirilgan foto va videomateriallari bilan qatnashishi mumkin. Tanlovda ishtirok etayotgan veb-saytlar nafaqat hakamlar hay’ati, balki internetdan foydalanuvchilar tomonidan ham baholab boriladi.

G‘oliblar O‘zbekistonning boy tarixi, madaniyati va san’ati, istiqlol g‘oyalari, ma’naviy qadriyatlarimiz, iqtisodiyot, sayyohlik salohiyati, mahalla, qishloq va shaharlardagi farovon hayot, shuningdek, “Sog‘lom bola yili” Davlat dasturi doirasida amalga oshirilayotgan keng ko‘lamli bunyodkorlik ishlarini aks ettirgan eng yaxshi veb-saytlar singari yo‘nalishlar bo‘yicha e’lon qilinadi. Yoshlar ishtirokida o‘zbek mumtoz adabiyoti va she’riyatini keng targ‘ib etadigan eng yaxshi rolik, O‘zbekiston tabiati va tarixiy yodgorliklarini namoyish etadigan internet tarmog‘idagi eng yaxshi fotogalereyalar tanlab olinadi.

Bundan tashqari, “Davlat tilidagi eng yaxshi sayt”, “Ikki tilda yaratilgan eng yaxshi sayt”, “Mobil aloqa vositalari uchun mo‘ljallangan eng yaxshi sayt yoki qo‘shimcha dastur”, “Eng yaxshi sayt dizayni” kabi qo‘shimcha nominatsiyalar bo‘yicha ham g‘oliblar aniqlanadi.

MIT.uz milliy internet tanlovida ishtirok etish uchun arizalar joriy yilning 25-aprelidan 1-iyuliga qadar qabul qilinadi. G‘oliblarni taqdirlash marosimi InfoCOM—2014 an’anaviy axborot-kommunikatsiya texnologiyalari haftaligi doirasida bo‘lib o‘tadi.

Milliy internet tanloviga oid qo‘shimcha ma’lumotlarni mit.uz saytidan olish mumkin.