Putin internetni AQSh maxsus xizmatlari loyihasi deb atadi

Rossiyaning Sankt-Peterburg shahrida bo‘lib o‘tgan media forumda nutq so‘zlar ekan, prezident Vladimir Putin yirik milliy internet-resurslar serverlaridagi ma’lumotni himoya qilish maqsadida ularni Rossiya hududida joylashtirish juda muhim masala ekanligini ta’kidladi. Bu haqda “ITAR-TASS” xabar berdi.

“Buni amalga oshirish mumkin, amalga oshirish shart, faqat ma’lum vaqt va mablag‘ talab etiladi”, — dedi davlat rahbari. Uning aytishicha, hozirda asosiy axborot oqimi AQShda joylashgan serverlar orqali o‘tmoqda. Shuning bilan birga, Putin internet AQSh maxsus xizmatlari loyihasi sifatida yuzaga kelgani va shu asosda rivojlanib borayotganini eslatib o‘tdi.

Vladimir Putin “Yandeks” milliy qidiriv xizmati va “VKontakte” ijtimoiy tarmoqlari biznes, matematika va axborot ta’minotini rivojlantirishga intilayotganiga ham to‘xtalib o‘tdi. “Bizning kompaniyalarimizda buning uchun kerakli erkin moliyaviy resurslar yo‘q edi, endilikda ular asta-sekinlik bilan paydo bo‘lishni boshladi”, — dedi prezident. U Rossiya internetining jadallik bilan rivojlanishi va milliy manfaatlarga xizmat qilishiga umid bildirdi.

Serverlarni Rossiya hududiga o‘tkazish, prezident fikricha, saqlanayotgan axborotning xavfsizligini ta’minlaydi.