Nukus davlat pedagogika instituti talabalari “Tafakkur sinovlari” tanlovida g‘olib bo‘ldi

Nukusda “Tafakkur sinovlari” ko‘rik-tanlovining Qoraqalpog‘iston Respublikasi bosqichi bo‘lib o‘tdi, deb xabar berdi O‘zA.

O‘zbekiston Respublikasi Oliy va o‘rta maxsus ta’lim, Adliya vazirliklari, “Kamolot” yoshlar ijtimoiy harakati markaziy kengashi hamkorligida tashkil etilgan tanlovda oltita oliy o‘quv yurti jamoalari ishtirok etdi.

– Tanlov Prezident Islom Karimovning 2014-yil 6-fevraldagi “O‘zbekiston Respublikasida yoshlarga oid davlat siyosatini amalga oshirishga qaratilgan qo‘shimcha chora-tadbirlar to‘g‘risida”gi qarori ijrosi doirasida amalga oshirayotgan ishlarimizdan biri, – deydi “Kamolot” yoshlar ijtimoiy harakati Qoraqalpog‘iston Respublikasi kengashi raisi o‘rinbosari A. Doniyorov. – Jamoalar “Topqirlik”, “Sahnada tafakkur sinovi”, “Yoshlarga oid qonunlar – talabalar nazarida” kabi shartlar bo‘yicha o‘z bilimlarini sinovdan o‘tkazdi.

Ajiniyoz nomidagi Nukus davlat pedagogika institutining “Istiqlol yoshlari” jamoasi birinchi o‘rinni egalladi. Ikkinchi va uchinchi o‘rinlar Berdaq nomidagi Qoraqalpoq davlat universitetining “Istiqlol qanotlari” va O‘zbekiston davlat san’at va madaniyat instituti Nukus filialining “Intilish” jamoalariga nasib etdi.

G‘olib jamoa tanlovning mamlakat bosqichida ishtirok etadi.