AQSh Harbiy dengiz kuchlari qo‘mondonligi o‘zining Qora dengizdagi kemalari sonini ko‘paytirmoqda. Bu haqda 23-aprel kuni Rossiya Harbiy dengiz floti bosh shtabi “Interfaks” agentligiga ma’lum qilgan. 22-aprel kuni Amerikaning “Teylor” fregati (USS Taylor) bo‘g‘ozlarni kesib o‘tib, Qora dengizga yetib kelgan.
Avvalroq, AQSh HDK axborot xizmati tomonidan ma’lum qilinganidek,“Teylor”ning maqsadi Vashingtonning NATO doirasidagi ittifoqchilariga ushbu mintaqada alyans kuchlari bilan o‘zaro hamkorlikni rivojlantirish borasidagi intilishlarini tasdiqlashdir.
“Interfaks” vakilining xabar berishicha, “Teylor” Sochidagi Olimpiya o‘yinlari davrida Amerikaning 6-flotiga qarashli “Maunt Uitni” kemasi hamrohligida Qora dengiz tomon yo‘l olgan. 12-fevral kuni Turkiyaning Samsun portiga kirib borish paytida fregat vintiga shikast yetgan. Qora dengizdan “Teylor”ni yordamchi kema tortib olib ketgan va u Gretsiyaning Suda portida qayta ta’mirlangan.
AQSh Ukrainada 2013-yilning noyabr oyidan beri davom etayotgan siyosiy tanazzul munosabati bilan Qora dengizga o‘z harbiy kemalarini yuborishni davom ettirmoqda. Dengizning shimoliy qismida joylashgan Qrim yarimoroli esa Ukraina tarkibidan chiqib, Rossiya Federatsiyasining teng huquqli obyektiga aylandi. Aprel oyi boshlarida Ukraina sharqida federallashuv tarafdorlarining namoyishlari boshlandi. NATOga a’zo mamlakatlar bunda Rossiyaning qo‘li bor, deb hisoblashmoqda.
Avvalroq, Amerikaning “Donald Kuk” harbiy kemasi Qora dengizga yo‘naltirilgan edi. Hozirda u Ruminiya sohillari yaqinidagi mashg‘ulotlarda ishtirok etmoqda.
Izoh (0)