Toshkentda VII Innovatsion g‘oyalar, texnologiyalar va loyihalar respublika yarmarkasi ochildi. Bu haqda O‘zA xabar berdi.
Yarmarkada vazirliklar, idoralar, banklar, iqtisodiyotning barcha tarmoqlari korxonalari, jumladan, kichik biznes va xususiy tadbirkorlik vakillari, fermer xo‘jaliklari, Fanlar akademiyasining ilmiy-tadqiqot institutlari, oliy o‘quv yurtlari keng ishtirok etmoqda.
Yarmarkaning birinchi kunida korxonalar va loyihalar ishlab chiquvchilar o‘rtasida mahsulot va texnologiyalarni xarid qilish yoki tijoriy joriy etish bo‘yicha qiymati 1,2 milliard so‘mlik 50 dan ziyod shartnoma imzolangani diqqatga sazovordir.
Yarmarkada ishtirok etishni xohlagan ilm-fan, ta’lim, konstruktorlik tashkilotlari va alohida ixtirochilardan kelib tushgan 611 arizadan 494 tasi saralab olindi. Jumladan, ularning 171 tasi sanoat, 127 tasi qishloq xo‘jaligi, 53 tasi tibbiyot va farmakologiyani, 30 tasi axborot-kommunikatsiya texnologiyalari sohasini rivojlantirishga yo‘naltirildi.
Ta’kidlash joiz, joriy yilda eng ko‘p yangiliklarni O‘zbekiston oliy va o‘rta maxsus ta’lim tizimi muassasalari namoyish etmoqda. Shuningdek, talabalar va yosh olimlar 55 innovatsion mahsulotlarni taqdim qilmoqda.
Masalan, Abu Rayhon Beruniy nomidagi Toshkent davlat texnika universiteti ko‘plab istiqbolli loyihalarni taklif etayotir. Ular orasida quyosh energiyasidan quvvat oladigan ikki tomonlama shaffof ekranli mobil telefon, atmosferaning changlanish darajasini o‘lchaydigan mikroprotsessorli asbob, chiqindi gazlar tarkibidagi qurum miqdorini aniqlaydigan tutun o‘lchagich, elektron raqamli shisha hisoblagich va boshqa qiziqarli ishlanmalar bor.
Toshkent shahridagi Turin politexnika universiteti talabalari o‘zlarining mashinasozlik texnologiyasi, energetika, sanoat-fuqaro qurilishi va arxitektura, axborot texnologiyalari va sanoatda boshqarishning avtomatlashtirilgan tizimlari kabi yo‘nalishlardagi g‘oya, loyiha va ishlanmalarini taqdim etmoqda. Jumladan, universitetning to‘rtinchi bosqich talabasi Ma’ruf Mukarramov yarmarkaga tashrif buyurganlarga “ARM” avtomatlashtirilgan saralash tizimi maketini namoyish qilmoqda. Turli qismlarni saralashga ko‘maklashadigan ushbu robot qurilma istiqbolda mashinasozlik va avtomobil tarmog‘iga joriy qilinishi mumkin. Bu esa ish jarayonini yanada avtomatlashtirish va inson mehnatini kamaytirish imkonini beradi.
– Navoiy kompyuter texnologiyalari kasb-hunar kollejida o‘qib yurganimda mashinasozlik va ushbu jarayonni avtomatlashtirishga qiziqib qolgan edim, – deydi M. Mukarramov. – Toshkent shahridagi Turin politexnika universiteti talabasi bo‘lgach, o‘z bilim va qobiliyatimni yanada oshirish imkoniyatiga ega bo‘ldim. Chunki bu yerda buning uchun barcha sharoitlar yaratilgan. Maqsadim – mamlakatimizda talab yuqori bo‘lgan zamonaviy texnologiyalarni ishlab chiqish.
Yarmarkada tibbiyot va farmakologiya sohasining ko‘plab vakillari qatnashmoqda. Ular tomonidan namoyish etilayotgan innovatsiyalar tibbiyot sohasini har tomonlama rivojlantirish, davolash muassasalarining moddiy-texnika bazasini takomillashtirish va aholiga tibbiy xizmat ko‘rsatish ko‘lamini kengaytirishda muhim omil bo‘lishidan dalolat bermoqda. Masalan, Andijon davlat tibbiyot institutining gospital va fakultativ jarrohlik kafedrasi ilmiy xodimlari o‘z ixtirolari uchun 18 ta patent oldi. Shulardan to‘rttasi yosh olim, institut o‘qituvchisi Muhammadyahyo Teshaboyevga tegishli. Chunonchi, u yuz qismi kuygan bemorlarni jarrohlik reabilitatsiya qilishning yangi usullarini ishlab chiqdi. Mazkur usullar oddiyligi va samaradorligi bilan plastik jarrohlikning an’anaviy yondashuvlaridan afzaldir.
O‘zbekiston Respublikasi Fanlar akademiyasining “Fizika-Quyosh” ilmiy-ishlab chiqarish birlashmasi Fizika-texnika instituti an’anaviy keng ekspozitsiyasi bilan ishtirok etayotir. Iqtisodiyotning turli sohalari uchun fotoelektrik qurilmalar ishtirokchilar e’tiboriga havola qilinmoqda. Xususan, markazlashtirilgan energiya manbalaridan uzoqda joylashgan obyektlarni energiya bilan ta’minlashga qodir ko‘p vazifani bajaradigan mustaqil ko‘chma fotoelektrik tizim ko‘pchilikning e’tiborini tortmoqda. Institutning katta ilmiy xodimi Habibulla Sobirovning ta’kidlashicha, mazkur qurilma soatiga 30 kilovattgacha elektr energiyasi ishlab chiqarish imkonini beradi. Tizimni ko‘chirish uchun traktor tirkamasi asosidagi maxsus g‘ildirakli transportdan foydalaniladi. Bu borish qiyin bo‘lgan hududlarda ham uning ishlashiga imkoniyat yaratadi.
Muqobil energiya manbalari sohasida ATETM MChJ aloqa va toza energiya texnologiyalari markazi aloqa obyektlari uchun mustaqil quyosh va quyosh-shamol elektr stansiyalari, Andijon davlat universiteti fotoelektrik energota’minot tizimli yorug‘lik diodli yoritgich, Qarshi muhandislik-iqtisodiyot instituti suvni chuchuklashtiradigan gelioqurilma bilan ishtirok etmoqda.
Izoh (0)