Qosimovsiz qolgan “Bunyodkor” OChLda nimchorak final yo‘llanmasini qo‘lga kiritdi

O‘zbekistonning amaldagi chempioni “Bunyodkor” Osiyo Chempionlar ligasi—2014 dagi yurishini davom ettiradi. O‘zPFL matbuot xizmati xabariga ko‘ra, jamoa “B” guruhi 6-tur uchrashuvida safarda Qatarning “Al-Jaish” jamoasini 2:1 hisobida mag‘lubiyatga uchratdi.

“Bunyodkor” nimchorak final bosqichi yo‘llanmasini qo‘lga kiritishi uchun “Al-Jaish”ga qarshi o‘yinda faqat g‘alaba qozonishi shart edi, “Al-Jaish” esa mag‘lubiyatga uchramasa keyingi bosqichga yo‘l olar edi. Uchrashuvda esa hisob 13-daqiqada “Bunyodkor” futbolchilari tomonidan ochildi — jarima zarbasi amalga oshirilganidan so‘ng, “Al-Jaish” darvozaboni xatosidan unumli foydalangan “Bunyodkor”ning ukrainalik himoyachisi Sergey Simonenko gol urdi.

“Bunyodkor” tanaffusga hisobdagi ustunlik bilan chiqib ketdi, biroq ikkinchi taym boshida Muhammad Muntariyning goli o‘tkazib yuborildi. “Al-Jaish”ni durang natija qoniqtirgani uchun, qatarlik futbolchilar so‘nggi daqiqalarda asosiy e’tiborni himoyaga qaratdi. “Bunyodkor” esa uchrashuv asosiy vaqtiga bosh hakam tomonidan qo‘shib berilgan 4-daqiqada g‘alaba to‘pini kiritishga muvaffaq bo‘ldi — Sardor Rashidovning goli Aleksandr Volkov shogirdlarini nimchorak finalga olib chiqdi.

Qayd etish joiz, “Bunyodkor” OChL—2014 “V” guruhidagi dastlabki to‘rtta o‘yinni bosh murabbiy Mirjalol Qosimov qo‘l ostida o‘tkazib, faqat “Al-Fath” (Saudiya Arabistoni, 0:0) va “Fulad” (Eron, 1:1)ga qarshi o‘yinlarda bir ochkodan ishlagan, “Al-Jaish”ga qarshi Toshkentdagi (1:2) va “Fulad”ga qarshi safardagi (0:1) o‘yinlarda imkoniyatni boy bergan edi. Mirjalol Qosimov bor e’tiborini milliy terma jamoaga qaratishi ma’lum bo‘lib, jamoa boshqaruvini vaqtincha Aleksandr Volkov qo‘l olganidan so‘ng, “Bunyodkor” dastlab “Al-Fath”ni Toshkentda (3:2), so‘ng “Al-Jaish”ni safarda (2:1) mag‘lub etdi.

Osiyo Chempionlar ligasi bahslarida 2008-yildan beri muntazam ravishda ishtirok etib kelayotgan “Bunyodkor” musobaqaning pley-off bosqichiga chiqish an’anasini saqlab qolishga muvaffaq bo‘ldi – Toshkent klubi har safar kamida nimchorak final bosqichi yo‘llanmasini qo‘lga kiritgan. “Bunyodkor” 2014-yilgi Chempionlar ligasining nimchorak finalida Saudiya Arabistonining “Al-Hilol” jamoasiga qarshi bahs olib boradi. Ushbu jamoalar o‘rtasidagi dastlabki o‘yin 7-may, chorshanba kuni Toshkentda, javob o‘yini esa 14-may, chorshanba kuni Saudiya Arabistonida bo‘lib o‘tadi.