O‘zbekiston huquq-tartibot va xavfsizlikni ta’minlash bo‘yicha yetakchi besh mamlakat qatoridan o‘rin oldi. Jahon miqyosida qonun ustuvorligining navbatdagi Indeksini e’lon qilgan The World Justice Project mustaqil xalqaro tashkilotining yillik ma’ruzasida shu haqda ma’lum qilingan, deb yozadi O‘zA.
Davlatlarning yutuqlari, avvalo, jinoyatchilikka qarshi kurashish, siyosiy zo‘ravonlik, shu jumladan, terrorizm, qurolli to‘qnashuvlar va siyosiy tartibsizliklar, shuningdek, huquq-tartibot organlari va jinoiy odil sudlov tizimiga nisbatan ishonchning yo‘qotilishi oqibatida yuzaga keladigan zo‘ravonlikning oldini olish borasida huquq ustuvorligini ta’minlash bo‘yicha asosiy tamoyilga rioya qilinishining samaradorligiga ko‘ra baholangan.
Indeksda ushbu omil bo‘yicha Yaponiya birinchi o‘rinni egallagan. Ikkinchi o‘rin Singapurga berilgan. Uchinchi o‘rinni O‘zbekiston, Daniya va Gonkong egallagan. O‘zbekistondan keyingi o‘rinlarda AQSh, Belgiya, Norvegiya, Estoniya, Qozog‘iston, Rossiya va boshqa mamlakatlar qayd etilgan.
Ekspertlarning fikricha, mazkur mustaqil xalqaro tashkilotning yuqori bahosiga sazovor bo‘lgan O‘zbekistondagi huquq-tartibot va xavfsizlik mustaqillik yillarida izchil va bosqichma-bosqich amalga oshirilayotgan va ijtimoiy-siyosiy, sotsial-iqtisodiy sohalardagi eng dolzarb masalalarni samarali hal etishga yo‘naltirilgan tizimli, keng ko‘lamli ishlar natijasidir.
Jinoyat va jinoiy-protsessual qonunchilikning liberallashtirilishi, insonparvarlik tamoyilining kuchaytirilishi bu boradagi eng muhim yo‘nalishni tashkil etdi. “Xabeas korpus” institutining joriy etilishi va o‘lim jazosining bekor qilinishi prinsipial qadam bo‘ldi.
Ma’lumot uchun: Jahon miqyosida qonun ustuvorligi Indeksi ilk marotaba 2010-yilda e’lon qilingan bo‘lib, jahonning turli mamlakatlarida o‘tkazilgan ijtimoiy so‘rovlar natijalariga va ekspert manbalarini o‘rganishga asoslangan tadqiqotdir.
Davlatlarga baho berishda “Tartib va xavfsizlik” yo‘nalishiga bosh mezonlardan biri sifatida yondashilib, uning doirasida xalqaro ekspertlar dunyoning 99 mamlakatidagi tartib va xavfsizlik bilan bog‘liq vaziyatni ko‘rib chiqadi. Shuningdek, ushbu mamlakatlardagi huquqiy muhitni, jamiyat va davlatning o‘zaro hamkorligini, mustaqil va xolis sudlarning mavjudligini, huquq-tartibot organlari nechog‘li samarali faoliyat yuritishini va boshqa omillarni tadqiq qiladi.
Izoh (0)