23-aprel kuni Toshkentdagi “Labzak” biznes markazi binosida yuz bergan portlash oqibatida uch erkak va bir ayol turli darajadagi tan jarohati olgan va ular shifoxonaga yetkazilgan. Gazeta.uz’ning huquqni muhofaza qiluvchi organlar ma’lumotiga tayanib xabar berishicha, ayol jarohati tufayli vafot etgan.
Avval xabar berganimizdek, 23-aprel taxminan soat 18:00 da biznes markazning 1-qavatida tabiiy gazdan noto‘g‘ri foydalanish natijasida maishiy gazning fizik chaqnashi sodir bo‘lgan. Guvohlar kuchli shovqin eshitganini ma’lum qilgan. Voqea yuz bergan joyda alanga bo‘lmagan.
Halokat ro‘y bergan joyga tegishli organlar vakillari tezlikda yetib kelgan. Binodan 40 nafarga yaqin kishi evakuatsiya qilingan.
Portlash oqibatida binoning birinchi qavatidagi devorlari hamda birinchi va ikkinchi qavatlar o‘rtasidagi to‘siq buzilgan. Hozircha tasdiqlanmagan ma’lumotlarga ko‘ra, bino bir tarafga cho‘kib qolgan, biroq uning qulash xavfi yo‘q.
Bino yonidagi chorraxaga olib chiquvchi yo‘llar halokat tufayli vaqtinchalik berkitilgan edi. Ayni vaqtda yo‘llar ochilgan, deyiladi Gazeta.uz xabarida.
Izoh (0)