Toshkentdagi “O‘zekspomarkaz”da Mashinasozlik, elektrotexnika va aviatsiya sanoatini rivojlantirish, mahsulotlarni standartlashtirish masalalari majmuasining tarmoq sanoat yarmarkasi ochildi, deb yozadi O‘zA.
Yarmarkada bu yil 130 dan ortiq korxona, jumladan, Toshkent traktor zavodi, Toshkent mexanika zavodi, “Chirchiqqishloqmash” ochiq aksiyadorlik jamiyati, agregat zavodi, shuningdek, “O‘zavtosanoat”, “O‘zeltexsanoat” aksiyadorlik kompaniyalari korxonalari va boshqalar o‘z mahsulotlarini namoyish etmoqda.
Elektr texnikasi sanoati korxonalari xilma-xil mahsulotlar bilan qatnashmoqda. “O‘zeltexsanoat” aksiyadorlik kompaniyasining marketing, ishlab chiqarish, eksport salohiyatini va axborot-kommunikatsiya texnologiyalarini rivojlantirish boshqarmasi boshlig‘i X. Yusupovning so‘zlariga ko‘ra, joriy yilda tarmoq sanoat yarmarkasida 15 korxona o‘ndan ortiq yangi turdagi maishiy texnika taqdim qilmoqda. Ular orasida “Sino” ochiq aksiyadorlik jamiyati, “Artel” savdo belgisi ostidagi kompaniyalar guruhi, Zenith Electronics qo‘shma korxonasi va boshqalar mavjud.
2013-yili tarmoq yarmarkasida mazkur korxonalar tomonidan elektr texnikasi mahsulotlarini sotish bo‘yicha qiymati 2 milliard so‘mdan ziyod shartnomalar tuzilgan edi. Joriy yilda bu miqdor 3 milliard so‘mga yetishi kutilmoqda.
Yarmarkada O‘zbekiston avtomobil sanoati salohiyatini jahon standartlariga javob beradigan mahsulotlar ishlab chiqarayotgan qator korxonalar namoyish qilmoqda. Masalan, General Motors Uzbekistan qo‘shma korxonasi Chevrolet savdo belgisidagi to‘qqizta avtomobilni ko‘rgazmaga qo‘ydi. 2014-yildan boshlab ishlab chiqarilayotgan Chevrolet Orlando oilaviy mini-veni asosiy eksponatga aylandi. JV MAN Auto-Uzbekistan qo‘shma korxonasi yuk avtotransportlarining keng turlarini taqdim etmoqda. Korxona tomonidan ishlab chiqarilayotgan samosval, kombinatsiyalangan yo‘l mashinalari, FAUN chiqindi tashish transportlari, Betamix qorishtiruvchi, sement tashiydigan mashina va boshqa texnikalardan avtomobil hamda temir yo‘l qurilishi, rekonstruksiya qilish va shaharlararo tashishda samarali foydalanilmoqda. “SamAvto” mas’uliyati cheklangan jamiyati yarmarkada bir necha turdagi maxsus texnikalar, Isuzu avtobuslarini keng jamoatchilik e’tiboriga havola qilmoqda. Shuningdek, korxonada ishlab chiqilgan yangi shoshilinch va tez tibbiy yordam mashinasi ishtirokchilar uchun yangilik bo‘ldi.
Tarmoq sanoat yarmarkasi qishloq xo‘jalik mashinasozligining eng so‘nggi yutuqlari bilan tanishish imkonini bermoqda. Toshkent traktor zavodi traktor, tirkama, paxta terish mashinalarining bir necha turini, agregat zavodi esa purkagich, seyalka, rotorli o‘roq, o‘g‘it sochadigan texnikalar, “Texnolog” ochiq aksiyadorlik jamiyati paxta terish mashinalarining butlovchi qismlarini, “Chirchiqqishloqmash” ochiq aksiyadorlik jamiyati plug va kultivatorlarni namoyish qilmoqda.
Uz CLAAS Agro mas’uliyati cheklangan jamiyati 18 turdagi texnologik asbob-uskuna va sakkiz rusumdagi qishloq xo‘jaligi texnikalarini taqdim etmoqda. Ular orasida ayni paytda Toshkent viloyatida sinovdan o‘tkazilayotgan g‘o‘za qator oralariga ishlov berishga mo‘ljallangan yangi traktor ham mavjud. Tez orada mazkur traktorni seriyali ishlab chiqarish rejalashtirilmoqda.
Izoh (0)