Surxondaryo viloyatida 40 dan ortiq nikoh to‘yi muayyan muddatga to‘xtatildi, deb xabar berdi O‘zA.
“Mahalla” xayriya jamoat fondi viloyat bo‘limi bergan ma’lumotlarga ko‘ra, erta turmushning oldini olish bo‘yicha ko‘rilayotgan chora-tadbirlar natijasida Angor tumanida ikki, Uzun tumanida uch, Qumqo‘rg‘onda yetti, Muzrabotda sakkiz, Termiz shahrida bitta nikoh to‘yini muayyan muddatga to‘xtatib qo‘yishga to‘g‘ri keldi.
– Qizlarni erta turmushga uzatishning oldini olishda mahalla jamoatchiligi yaqindan ko‘maklashmoqda, – deydi Qumqo‘rg‘on tumanidagi “Paxtaobod” mahalla fuqarolar yig‘inining diniy ma’rifat va ma’naviy-axloqiy tarbiya masalalari bo‘yicha maslahatchisi Oydavlat Rahimova. – Jumladan, joriy yilning o‘tgan davrida Qumqo‘rg‘on yengil sanoat kasb-hunar kollejida tahsil olayotgan ikki qizning nikoh to‘yi vaqtincha to‘xtatildi. Buning uchun mahalla jamoatchiligi vakillari ishtirokida qizlarning ota-onalari bilan suhbat o‘tkazilib, erta turmushning salbiy oqibatlari ularga tushuntirildi.
Viloyatda o‘tgan yillarda yo‘l qo‘yilgan kamchiliklar atroflicha tahlil qilinib, voyaga yetmagan o‘quvchi qizlarni turli to‘garaklarga jalb etishga alohida e’tibor qaratilmoqda. Mahalla fuqarolar yig‘inlari qoshidagi “Ota-onalar universiteti” va “Maslahat markazlari” faoliyati takomillashtirilib, ota-onalarning huquqiy, ma’naviy-axloqiy, fiziologik bilimlarini oshirish bo‘yicha tadbirlar tashkil etilmoqda.
Umumta’lim maktablari va kollejlarda “Sog‘lom oila – yurt tayanchi”, “Tibbiy ko‘rikning ahamiyati”, “Erta turmushga chiqishning oqibatlari”, “Siz turmush qurishga tayyormisiz?”, “Erta homiladorlikning oqibatlari” kabi mavzularda uchrashuv, seminar va davra suhbatlari muntazam tashkil etilmoqda. Mahallalarda “Farzandlar tarbiyasida ota-onaning vazifalari”, “Oilada otaning o‘rni” kabi mavzularda o‘tkazilayotgan ma’rifiy tadbirlar har tomonlama barkamol avlodni voyaga yetkazish, ularning zamonaviy bilim va kasb-hunar egallashiga ko‘maklashishda muhim ahamiyat kasb etmoqda.
Izoh (0)