O‘zbekiston Badiiy akademiyasi Markaziy ko‘rgazmalar zalida tasviriy san’at festivali boshlandi. Shu munosabat bilan tashkil etilgan tantanali tadbirda turli vazirlik va idoralar, ijodiy va jamoat tashkilotlari, mamlakatimizda faoliyat ko‘rsatayotgan xorijiy diplomatik korpus vakillari, o‘qituvchilar, ma’naviyat targ‘ibotchilari, talaba-yoshlar ishtirok etdi, deb yozadi O‘zA.
Bu yil 11-marta o‘tkazilayotgan, Sog‘lom bola yiliga bag‘ishlangan festivalda – yosh musavvirlar, haykaltarosh va hunarmandlar tomonidan yaratilgan eng sara asarlar mehribonlik uylari, maxsus maktab-internatlarga taqdim etiladi. Ushbu ta’lim-tarbiya maskanlarining tarbiyalanuvchilari, o‘quvchilari ham festival tadbirlariga taklif qilindi. Mazkur loyiha doirasidagi tadbirlar davomida alohida ehtiyojli bolalar uchun rassomlar ishtirokida mahorat saboqlari o‘tkazilishi ko‘zda tutilgan.
Tasviriy san’atning o‘ziga xos marafoni bo‘lgan ushbu ijodiy haftalik qiziqarli va betakror badiiy dasturlar, konsertlar, davra suhbatlari, uchrashuvlarga boyligi bilan ahamiyatlidir. Festival doirasida milliy liboslar, san’at va madaniyatimizga bag‘ishlangan filmlar namoyish etiladi.
San’at haftaligida Qoraqalpog‘iston Respublikasi va viloyatlarda faoliyat ko‘rsatayotgan rassomlar ijodi hamda Badiiy akademiya tizimidagi oliy va o‘rta maxsus o‘quv yurtlari talabalari faoliyatiga alohida e’tibor qaratiladi. Samarqandlik kulol Sharif Azimovning shaxsiy ko‘rgazmasi o‘tkaziladi. Festival doirasida yaponiyalik va ozarbayjonlik ijodkorlar asarlaridan iborat ko‘rgazmalarning tashkil etilishi ijodiy loyihaning ko‘lami kengligidan darak beradi.
“Zamonaviy tasviriy san’at: an’ana va yangilik” mavzusidagi anjumanda o‘zbek tasviriy san’atining rivojlanish tamoyillari, yosh ijodkorlar faoliyati, ular izlanayotgan janrlar muhokama etiladi. O‘zbekiston xalq shoiri Muhammad Yusuf tavalludiga bag‘ishlab tashkil etilgan ko‘rgazma san’at va she’riyat ixlosmandlari uchun o‘ziga xos tuhfa bo‘ladi.
— O‘zbekistonning so‘lim tabiatini, Toshkentning betakror go‘zalligini ko‘rishni ko‘pdan buyon orzu qilardim, — deydi ozarbayjonlik haykaltarosh Husayn Ahverdiyev. — Bu tabarruk zamin Amir Temur, Beruniy, Ibn Sino, Mirzo Ulug‘bek, Zahiriddin Bobur kabi jahon sivilizatsiyasi rivojiga ulkan hissa qo‘shgan ko‘plab allomalarga beshik bo‘lgan diyordir. O‘zbek zaminining betakror san’ati va madaniyati har qanday ijodkorga ilhom bag‘ishlaydi. Yurtingizda san’atga, san’at ahliga ko‘rsatilayotgan g‘amxo‘rlik va e’tiborning amaliy ifodasini ushbu festivalning yuksak saviyada, ko‘tarinki ruhda o‘tkazilishi misolida yaqqol ko‘rish mumkin.
– Festivalda o‘tgan yili ham ishtirok etganman, – deydi Respublika rassomlik kollejining 2-kurs o‘quvchisi Akbar Yoqubjonov. – U ijodiy ishlarimizni taniqli rassomlar nazaridan o‘tkazish, ustozlarning maslahatlaridan bahramand bo‘lish imkoniyati yaratilgani bilan ham ahamiyatlidir.
Tasviriy san’at festivali yurtimizning turli hududlarida yashab, ijod qilayotgan musavvirlar, xalq amaliy san’ati ustalarining ijod namunalaridan iborat katta ko‘rgazma bilan boshlandi.
Izoh (0)