Buxoro viloyati musiqali drama teatrida ulug‘ turkman shoiri va mutafakkiri Maxtumquli tavalludining 290-yilligiga bag‘ishlangan ilmiy-amaliy anjuman bo‘lib o‘tdi, deb xabar bermoqda O‘zA.
Respublika Baynalmilal madaniyat markazi, “O‘zbekiston-Turkmaniston” do‘stlik jamiyati, Turkmanistonning mamlakatimizdagi elchixonasi, O‘zbekiston Yozuvchilar uyushmasi va viloyat hokimligi hamkorligida tashkil etilgan tadbirda adabiyotshunos olimlar, adiblar, Turkmanistondan kelgan mehmonlar ishtirok etdi.
Adabiyot namoyandalari tavallud sanalari nishonlanishi ikki yurtda ham an’anaga aylangan. Maxtumqulining 290-yilligiga bag‘ishlab Buxoroda o‘tkazilgan adabiy muloqot ham bunga yorqin misoldir.
– Ulug‘ o‘zbek shoiri va mutafakkiri Alisher Navoiyni Turkmanistonda sevib o‘qishadi, – deydi Turkmaniston Fanlar akademiyasi muxbir a’zosi G. Murodov. – Milliy musiqamizda Navoiy degan parda bor. Shunday ulug‘ shoir asarlaridan ilhom va saboq olgan Maxtumqulini ham dunyo biladi. Uning asarlari jahon xalqlarining 20 dan ziyod tiliga tarjima qilingan. Turkman adabiyotiga tamal toshini qo‘ygan Maxtumquli ijodiga O‘zbekistonda ham qiziqish yuqoriligi bizni quvontiradi.
Tadbir doirasida viloyat turkman milliy madaniyat markazi tomonidan tashkil etilgan Maxtumquli hayoti va ijodiga bag‘ishlangan ko‘rgazma namoyish etildi.
Ilmiy-amaliy anjuman o‘zbek va turkman san’atkorlarining konsert dasturi bilan yakunlandi.
Izoh (0)