Ashxobodda Otamurot Niyozov – Turkmanistonning sobiq prezidenti Saparmurot Niyozov (Turkmanboshi)ning otasiga qo‘yilgan haykal olib tashlandi. Bu haqda “Turkmaniston xronikalari” xabar bermoqda.
Monument Chexov ko‘chasi yonidagi xiyobonga o‘rnatilgan edi. U 2001-yili tantanali ravishda ochilgan, haykalning ochilishida prezident Niyozov ham ishtirok etgan edi. Haykal nima sababdan olib tashlangani ma’lum qilinmagan. Nashrning qayd etishicha, bir qator ma’lumotlarga ko‘ra u Qipchoq qishlog‘iga ko‘chirilgan – Ashxobod ostonasidagi ushbu manzilgoh Turkmanboshining ona qishlog‘i hisoblanadi, deb ma’lum qiladi “Kun”. Otamurot Niyozov Ikkinchi jahon urushi vaqtida halok bo‘lgan. SSSR parchalanib, Turkmaniston hokimiyati tepasiga Saparmurot Niyozov kelganidan so‘ng Turkmaniston qahramoni unvoni bilan taqdirlangan edi. Turkmaniston sharqidagi bir shaharga uning nomi berilgan, 2004-yil esa Otamurot Niyozov yili deb e’lon qilingan edi. Saparmurot Niyozov o‘limiga qadar — 2006-yilgacha Turkmanistonga rahbarlik qilgan va bu davr mobaynida mamlakatda uning, shuningdek, uning oila a’zolari shaxsiga sig‘inish shakllangan edi. Hokimiyat tepasiga Gurbanguli Berdimuhamedov kelganidan so‘ng avvalgi prezident shaxsiga bo‘lgan qiziqish kamayishni boshladi. Mamlakatda avvalgi prezident sharafiga o‘rnatilgan haykallarni olib tashlash boshlandi. Maktablarda esa bungacha “muqaddas kitob” maqomiga ega bo‘lgan Niyozovning “Ruhnoma” asarini o‘qitish to‘xtatildi. Shu bilan birga mamlakatda Berdimuhamedov shaxsiga sig‘inish boshlandi. Uni “Arkadag” (“Homiy”) deb, uning prezidentlik davrini esa “Kuch-qudrat va baxtiyorlik davri” deb atash boshlandi. Ayni vaqtda 2012-yili Izgant qishlog‘ida (Axal viloyati)da prezident otasi Malikguli Berdimuhamedovga hayotligida haykal qo‘yildi. Avvalroq esa Ashxoboddagi harbiy qismlardan biriga uning nomi berilgan edi.
Izoh (0)