Munisa Rizayeva 30-may kuni turmushga chiqadi

Xonanda Munisa Rizayeva o‘z kasbdoshi Jasur G‘oyipovga turmushga chiqadi. Bu haqda “Sayyod” sayti xabariga tayanib “Kun” ma’lum qildi.

Xabar berishlaricha, 19-aprel, shanba kuni Munisa Rizayeva va Jasur G‘oyipovning fotihasi bo‘lgan, ushbu tadbirdan birinchi bo‘lib fotosuratlarni radioboshlovchi Jamshid Hojiniyozov o‘z Instagram’ida e’lon qilgan.Munisa Rizayevaning “Sayyod”ga ma’lum qilishicha, to‘y haqidagi gaplar “hazil emas”.

29-may kuni ‘ZAGS’, 30-may kuni esa to‘yim, – deb ma’lum qilgan Munisa Rizayeva.

Munisa Rizayeva rasmiy saytidagi ma’lumotlarga ko‘ra, bolaligi Londonda o‘tgan Munisa Rizayeva 2010-yilda Toshkentga kelgan va 2011-yildan yakkaxon xonandalik faoliyatini boshlagan. 2012-yilda debyut albomini chiqargan. “Uning har bir yangi qo‘shig‘i – “Ayrilma yor”, “Ko‘zlarim yana”, “Yengilmas sevgi”, “Ey, samo”, “Gollivud” – deyarli butun mamlakat biladigan xit darajasiga ko‘tarildi”, – deyiladi xonanda rasmiy saytidagi tarjimai holda.

26 yoshli Jasur G‘oyipov taniqli o‘zbek xonandasi Davron G‘oyipovning jiyani hisoblanadi. Jamshid Hojiniyozov uning prodyuseri hisoblanadi. “Sayyod”ning talqiniga ko‘ra, Jasur G‘oyipov “Sovet Ittifoqi va o‘zbek roki tirik afsonasi hisoblangan Davron G‘oyipovning ijodiy davomchisidir”. Hozirgacha 50 dan ziyod qo‘shiq yozgan, “Qaytma”, “Yolg‘izman”, “Aytmadim” qo‘shiqlariga klip ishlagan.