Rossiya Davlat migratsiya xizmati rahbari Konstantin Romodanovskiy shanba kuni Simferopolda jurnalistlar bilan bo‘lgan suhbatda 350 mingga yaqin Qrim aholisidan Rossiya fuqaroligiga o‘tish haqida arizalar kelib tushgani, biroq hozirda 250 mingta pasport tayyorlanganini ta’kidlagan. Bu haqda “Interfaks” xabar berdi.
Romodanovskiyning aytishicha, Qrim federal okrugi hududida Rossiya pasportni olish uchun arizalarni qabul qiladigan 300 ga yaqin punkt ishlab turibdi. “Bir hafta avval bunday punktlar soni 150 ta edi, biz ularning sonini mumkin qadar ko‘paytirdik”, — dedi Migratsiya xizmati rahbari. Migratsiya xizmati hisob-kitoblariga ko‘ra 1,5 milliondan 1,7 milliongacha bo‘lgan qrimliklar Rossiya pasportini olishi kerak. Uning aytishicha, hozirda kuniga 20 ming dona pasport tayyorlanmoqda va idora qonunda belgilangan muddatga qadar pasport topshirish ishlarini yakunlashga ulguradi.
Shunigdek, Romodanovskiy Qrim va Sevastopol aholisiga pasport tarqatish jarayonlari yarimorol Rossiya tarkibiga kiritilgan kundan boshlab belgilangan 3 oylik muddatdan keyin ham davom etishini ma’lum qilgan. “Shubhasiz, biz bu ishlarni yakunlamaymiz. Turli sabablar bilan 3 oylik muddat ichida pasport ola olmagan aholi undan keyin ham pasport olish uchun murojaat qilishi mumkin. Buning uchun barcha huquqiy asoslar mavjud”, — dedi Romodanovskiy. Berilgan xabarlarga ko‘ra, 3 mingga yaqin Qrim va Sevastopol aholisi Rossiya fuqaroligini rad etishgan.
Qrimni Rossiya Federatsiyasi tarkibiga qo‘shilishi to‘g‘risidagi Bitimga ko‘ra, Rossiya pasportini olishni istamagan shaxslar 18-aprelga qadar shu mazmundagi arizani topshirishlari kerak edi. Qrim Respublikasi rahbari vazifasini bajaruvchi Sergey Aksyonovning ma’lum qilishicha, zarur bo‘lsa bunday arizalarni qabul qilish muddati uzaytirilishi mumkin. “Hozirda bunday shaxslar soni 3000 ga yaqin. Bu katta ko‘rsatkich emas, o‘ylaymanki, arizalar soni ko‘paymaydi. Aksincha, o‘z fikrini o‘zgartirgan shaxslar hisobiga kamayishi mumkin”, — dedi Migratsiya xizmati rahbari.
U o‘z so‘zini davom ettirar ekan, Rossiya hukumati 2015-yilning 1-yanvariga qadar bo‘lgan o‘tish davri mobaynida Rossiya pasportini olishni istamagan fuqarolarni ro‘yxatdan o‘tmaganlik sababi bilan hech qanday ma’muriy javobgarlikka tortmasligini ma’lum qilgan. Qrim Respublikasi va Sevastopol esa ana shu toifadagi shaxslarning ijtimoiy himoyasini ta’minlash va sog‘lig‘ini saqlash majburiyatini o‘z zimmasiga olgan. Yarimorolda doimiy ro‘yxatda turmagan qrimliklar esa sud qarori bilan Rossiya fuqaroligini qo‘lga kiritishlari mumkin.
Izoh (0)