2015-yilning yanvar oyida Avstraliyada bo‘lib o‘tadigan Osiyo Kubogi bahslari — final bosqichida 16 ta jamoa ishtirok etadigan so‘nggi musobaqa o‘tkaziladi. Osiyo Futbol Konfederatsiyasi (OFK)ning eng nufuzli musobaqasi final bosqichida ishtirok etadigan jamoalar soni 2019-yilgi musobaqadan boshlab 24 tani tashkil etadigan bo‘ldi. Bu haqda O‘zbekiston futbol federatsiyasi xabar berdi.
Shuningdek, JCh saralash bosqichi formatiga ham bir qator o‘zgartirishlar kiritildi. Unga ko‘ra, JCh so‘nggi saralash bosqichida ishtirokchilar soni 10 tadan 12 taga ko‘payadi.
Mazkur o‘zgarish OFK tomonidan e’lon qilingan eng muhim uch qarordan biri bo‘ldi. Kelasi yildan boshlab OFK Chaqiruv Kubogi musobaqasi ham o‘tkazilmaydi. 2014-yilning may oyida Maldiv orollarida o‘tkaziladigan Chaqiruv Kubogi musobaqasi turnir tarixida oxirgisi bo‘ladi.
Osiyo Kubogi final bosqichi saralashi hamda JCh 1-saralash bosqichi o‘yinlari birlashtirilishi mumkin. OFK bu masala yuzasidan yakuniy qarorini navbatdagi qo‘mita yig‘ilishida e’lon qiladi.
Yangi formatga ko‘ra, jami 40 ta terma jamoa har bir guruhda besh jamoadan sakkiz guruhga bo‘lingan holda saralash bahslarini boshlaydi. Guruhda birinchi o‘rinni egallagan sakkizta jamoa va eng yaxshi ikkinchi o‘rinda qayd etilgan yana 4 jamoa (jami 12 ta) Osiyo Kubogi final bosqichi va Jahon Chempionati so‘nggi saralash bosqichiga yo‘llanmani qo‘lga kiritadi. JCh-saralash so‘nggi bosqichida avvalgidek 10 ta emas, 12 ta terma jamoa oltitadan ikki guruhga bo‘lingan holda JCh yo‘llanmasi uchun kurashadi.
Qolgan 24 ta jamoa to‘rttadan olti guruhga bo‘lingan holda Osiyo Kubogi final bosqichining qolgan 12 ta yo‘llanmasi uchun kurashni davom ettiradi.
OK final bosqichi va JCh so‘nggi saralash bosqichi ishtirokchilari sonining kengaytirilganini OFK boshqa Futbol Uyushmalari terma jamoalarining ham ushbu musobaqalarda ishtirok etishini ta’minlashi bilan izohlagan.
Izoh (0)