Vyetnam moliyaviy muammolar sabab 2019-yilgi Osiyo o‘yinlarini o‘tkazishdan voz kechdi. 2012-yil Dubayda o‘tgan Osiyo Olimpiya kengashi sessiyasidagi saylovlarda Xanoy shahri (29 ovoz) Indoneziyaning Surabaya (14) shahridan ustun kelgan edi. O‘sha paytda bu g‘alabani katta tantana qilgan Vyetnam hukumati iqtisodiy inqiroz tufayli bugun yirik miqyosdagi tadbirlar o‘tkazishga tayyor emasligini bildirgan, deb xabar bermoqda Daily Times nashri ma’lumotiga tayanib Sports.uz.
Avvaliga rasmiylar 18-Yozgi Osiyo o‘yinlarini munosib tarzda o‘tkazish, ya’ni yangi sport obyektlari, Olimpiada qishlog‘i kabilar uchun 150 million AQSh dollari talab etilishini bildirgan. Keyinchalik qilingan hisob-kitoblarga ko‘ra, 16 kunlik “to‘y” mamlakatga bundan-da qimmatroqqa tushishi oydinlashgan. Vyetnam Olimpiya qo‘mitasi Osiyo o‘yinlarining yangi xarajat-smetasi 300 million dollar ekanini ma’lum qilganidan so‘ng mablag‘ borasida muammolar yuzaga kelgan.
— Osiyo Olimpia kengashi Xanoydagi 18-Osiyo o‘yinlarini o‘tkazishda bergan yordami uchun minnatdormiz, — deydi Vyetnam bosh vaziri Nguyen Tan Dung hukumat rasmiy saytidagi bayonotida. — Yirik musobaqalarni o‘tkazishdagi tajribaning yo‘qligi, mamlakatdagi ijtimoiy-iqtisodiy qiyinchiliklar sabab musobaqa mezbonligidan voz kechmoqdamiz. Vyetnam kelgusida boshqa Osiyo o‘yinlariga mezbonlik qiladi, degan umiddamiz.
Izoh (0)