Samarqandda an’anaviy “Kasaba – tur” velomarafonining viloyat bosqichi bo‘lib o‘tdi. “Sog‘lom bola yili” Davlat dasturi doirasida O‘zbekiston kasaba uyushmalari federatsiyasi kengashi tomonidan tashkil etilgan musobaqada 300 nafardan ziyod havaskor velosportchilar qatnashdi, deb yozadi O‘zA.
– Sog‘lom turmush tarzini qaror toptirish, sportning ommaviyligini oshirishda bu kabi musobaqalarning ahamiyati katta, – deydi viloyat kasaba uyushmalari tashkilotlari birlashmasi kengashi raisi Farhod Xidirov. – Shu bois yildan-yilga mazkur tadbirga qiziqish ortib bormoqda. Bu gal ham turli yoshdagi kishilar musobaqada faol qatnashdi.
Yosh poygachilar orasida Temur Esonov, xotin-qizlar o‘rtasida Sitora Bobokalonova marraga birinchi yetib keldi. Keksa yoshdagi havaskor velosportchilar o‘rtasida 74 yoshli Ubaydulla Qosimov g‘olib bo‘ldi. Azamat Nuraliyev “Eng mahoratli poygachi”, deb topilgan bo‘lsa, “G‘alabaga bo‘lgan intilishi uchun” maxsus sovrini Elbek Norbekovga topshirildi.
G‘oliblar musobaqaning respublika bosqichiga yo‘llanmani qo‘lga kiritdi.
Izoh (0)