2014-yili Buxoroda 18 mingdan ortiq yangi ish o‘rni yaratildi

Buxoro shahrida odam savdosiga qarshi kurashish bo‘yicha idoralararo viloyat komissiyasining yig‘ilishi bo‘lib o‘tdi. Unda O‘zbekiston Respublikasining “Odam savdosiga qarshi kurashish to‘g‘risida”gi qonuni ijrosi doirasida viloyat komissiyasi tomonidan olib borilayotgan ishlar tahlil qilindi. Bu haqda O‘zA xabar beradi.

Odam savdosi bilan bog‘liq jinoyatlarning oldini olish uchun aholi bandligini ta’minlash borasida Buxoro viloyatida qator chora-tadbirlar amalga oshirilmoqda. 2014-yilning o‘tgan davrida viloyatda yangi ishlab chiqarish obyektlarini foydalanishga topshirish, mavjud korxonalar quvvatini oshirish natijasida 18 415 yangi ish o‘rni yaratildi. Tuman va shahar bandlikka ko‘maklashish va aholini ijtimoiy muhofaza qilish markazlari tomonidan 4169 nafar, mehnat yarmarkalari orqali 2787 nafar fuqaroga ishga joylashish uchun yo‘llanma berildi. Ish bilan ta’minlanganlarning aksariyati yoshlar va xotin-qizlardir.

Noqonuniy mehnat migratsiyasi va odam savdosi jinoyatlarining oldini olishda mahallalarda, ta’lim muassasalarida targ‘ibot ishlari kuchaytirilmoqda. Ushbu jinoyatning salbiy oqibatlari to‘g‘risida aholini keng xabardor qilish maqsadida davra suhbatlari, seminarlar, ommaviy tadbirlar o‘tkazilmoqda.

Yig‘ilishda odam savdosidan jabr ko‘rganlarga tibbiy, ijtimoiy-ruhiy yordam ko‘rsatishga ham alohida e’tibor qaratilayotgani qayd etildi. Noqonuniy mehnat migratsiyasining oldini olish borasidagi kamchiliklar atroflicha muhokama etildi. Odam savdosiga qarshi kurashish bo‘yicha Romitan va Peshku tumanlari hududiy komissiyalari faoliyatini o‘rganish natijalari ko‘rib chiqildi.