“Toshkent” xalqaro aeroportida o‘tgan yilning yozidan boshlab chet eldan tashrif buyurgan yo‘lovchilar uchun amal qilgan aravachalardan foydalanishning jetonli tizimi bekor qilindi. Bu haqda Xususiylashtirish, monopoliyadan chiqarish va raqobatni rivojlantirish davlat qo‘mitasining Iste’molchilar huquqlarini himoya qilish boshqarmasi Gazeta.uz’ga xabar qildi.
Ma’lum bo‘lishicha, qo‘mitaga O‘zbekistonga xorijdan kelgan va yuk tashish bilan bog‘liq noqulayliklarga uchragan fuqarolardan murojaatlar tushgan.
Amalda bo‘lgan tizim bo‘yicha yo‘lovchi aravachadan foydalanish huquqini beruvchi jeton uchun 3000 so‘m miqdorida garov pulini qoldirishi kerak edi. Pulni qaytarib olish uchun aravachani yana joyiga keltirib qo‘yish lozim, aynan shu narsa noqulaylikni keltirib chiqargan.
Fuqarolar arizalarini ko‘rib chiqib, qo‘mita “O‘zbekiston havo yo‘llari” Milliy aviakompaniyasiga murojaat etdi va vaziyatni yo‘lovchilar foydasiga hal qildi.
Izoh (0)