Maxsus xizmat kuzatuvidan himoyani kafolatlovchi Lavaboom elektron pochta xizmati ishga tushdi. Bu haqda u Twitter’dagi sahifasida e’lon qildi.
“RIA Novosti” yozishicha, servis orqali yuboriladigan xabarlar shifrlanadi, uni faqat muallif va xatni qabul qilib oluvchigina o‘qishi mumkin.
“Shifrlanmagan matn xuddi ochiq otkritkadek: uni egasiga yetib borgunicha ming marta o‘qishadi. Biz esa maktubingizni ‘konvertga o‘rab’ yuboramiz”, — deyiladi kompaniya saytida.
Ayni paytda Lavaboom’da ro‘yxatdan o‘tish mumkin. Bu keyinroq pochta xizmatini yuklab olish uchun taklifnoma olishda kerak bo‘ladi. Taklifnomalar aprel oxiridan boshlab yuboriladi. Foydalanuvchilarga ikkita — ochiq va shaxsiy kriptografik kalitlar beriladi, ular xatlarni shifrlashda qo‘llaniladi.
Servisning bepul paketi ma’lumotlarni saqlash uchun 250 Mb ni o‘z ichiga oladi. Bu taxminan 1000 ta xat uchun yetarli. 1 Gb xotirali “premium-akkaunt” uchun esa oyiga 8 yevro to‘lash kerak.
Izoh (0)