Samsung Galaxy S5 sotuvga chiqqanidan bir hafta ham o‘tmasdan SRLabs laboratoriyasining “mohir qo‘llari” smartfondagi biometrik himoyani “buzish” yo‘lini o‘ylab topishdi. Bu haqda mail.ru xabar berdi.
“Mutaxassislar” barmoq izini (masalan, stakanda qoldirilgan) suratga tushirib, lazerli printer yordamida ko‘p miqdordagi toner bilan shaffof qog‘ozga chiqarib olishdi. So‘ng unga yog‘och uchun mo‘ljallangan yelim surib, quritishdi. Natijada barmoq izi nusxasi (qolipi) paydo bo‘ldi, u bloklab qo‘yilgan Samsung Galaxy S5’ni muammosiz ochdi.
Shunisi xavotirliki, Samsung PayPal pul o‘tkazmalari avtorizatsiyasi uchun ham bunday skanerni qo‘llaydi. Barmoq izingizni “o‘g‘irlagan” yomon niyatli kishilar bu imkoniyatdan foydalanishlari mumkin, ehtiyot bo‘ling, deb yozadi nashr.
Galaxy S5 5,1 dyuymli Super AMOLED displeyi (1920×1080), Qualcomm Snapdragon 801 to‘rt yadroli protsessor, 2 Gb tezkor va 16/32 Gb ichki xotira bilan ta’minlangan. Kamerasi 16 megapiksellidir. Soatiga 2800 megaamperli akkumulyator smartfonni suhbat rejimida 21 soatgacha quvvat bilan ta’minlab turadi.
Izoh (0)