O‘zbek bokschisi Bolgariyada texnik nokaut bilan g‘alaba qozondi

15-aprel kuni Bolgariyaning Sofiya shahrida boks bo‘yicha yoshlar o‘rtasida o‘tkazilayotgan jahon chempionatida ikki nafar o‘zbek sportchisi dastlabki janglarni o‘z foydalariga hal etdi.

Sports.uz’ning xabar berishicha, 60 kilogramm vazn toifasida terma jamoa sharafini himoya qilayotgan Iqboljon Xoldorov misrlik Muhammad Sayidallohga qarshi ringga ko‘tarilib, ikkinchi raundning uchinchi daqiqasida texnik nokaut bilan muvaffaqiyat qozondi.

Iqboljon kelasi jangida 19-aprel kuni avstraliyalik Uilson Liam bilan nimchorak final yo‘llanmasi uchun bellashadi.

Shuningdek, 56 kilogramm vazn toifasida bahslarga kirishgan Shukurjon Rahimov gruziyalik Masuradze Ucha bilan kuch sinashdi va g‘alabaga erishdi, deb yozadi Sports.uz.

Rahimovning navbatdagi raqibi germaniyalik Yildirim Murat bo‘lib, ular 18-aprel kuni bahslashadi.