Nyu-York politsiya boshqarmasi 15-aprel, seshanba kuni musulmon jamoatchiligi ustidan ehtimoliy terrorchilik harakatlarining oldini olish uchun nazorat olib borish bilan shug‘ullangan bo‘linmani tarqatib yuborish haqidagi qarorni e’lon qildi. Bu haqda “ITAR-TASS” xabar berdi.
2011-yil yozida Associated Press agentligining jurnalistlik tadqiqotlari yordamida Nyu-York politsiyasining musulmonlarni yashirincha kuzatishi ma’lum bo‘lgan edi.
Markaziy razvedka boshqarmasi bilan hamkorlikda politsiya musulmonlar hayotining barcha jabhalarini qamrab oluvchi kuzatuv dasturini ishlab chiqishgan. Musulmonlar qayerda ovqatlanishi, xaridlar qilishi, ishlashi, namoz o‘qishi haqidagi ma’lumotlar bazasi yaratilgan. Bundan tashqari, politsiya musulmonlar kvartallarida suhbatlarni tinglab, olingan ma’lumotlar bo‘yicha kunlik hisobotlar tuzgan.
Nyu-York politsiyasi ko‘pgina huquqni himoya qilish tashkilotlari tomonidan keskin tanqidga uchrab, ularning bunday harakatlari noqonuniy, deya e’tirof etildi. Sobiq mer Maykl Blumberg boshchiligidagi shahar hukumati musulmonlar ustidan nazorat olib borilishini tan olishga majbur bo‘ldi, biroq uning qonuniy ekani va bir necha marta terrorchilik harakatlarining oldini olganini ta’kidladi.
Nyu-Yorkning ayni paytdagi meri Bill de Blazio saylovoldi kampaniyalari chog‘ida ushbu dasturni yopishga va’da bergan edi.
Izoh (0)