14-aprel kuni soat 18:00 da “Alisher Navoiy” kinoteatrida “Sevgi, balki bu jannat” filmi premyerasi bo‘lib o‘tdi. Bu haqda Popcorn.uz sayti xabar berdi.
Premyerada film rejissori Rustam Sa’diyev so‘zga chiqib, kartina nomi va uning suratga olinishi xususidagi ba’zi bir ma’lumotlarni berdi. Film ikki qismli bo‘lgani uchun shu yilning avgust oylarida uning ikkinchi qismi ham muxlislarga taqdim etilishini ma’lum qildi.
“Sevgi, balki bu jannat” filmida bosh rollarni Yigitali Mamajonov va Yulduz Rajabova ijro etgan. Shuningdek, kinoda Sanjar Shodiyev, Sayyora Yunusova, Muyassar Berdiqulova, Ulug‘bek Xolmedov, Abduhakim Toshtemirov kabi mahoratli aktyor va aktrisalarning ham chiqishlarini ko‘rish mumkin.
Kinokartina Rustam Sa’diyev g‘oyasi va rejissorligida suratga olingan bo‘lib, ikkinchi rejissor Dilbar Yusupovadir. Ssenariy muallifi — Shoira G‘iyosova.
Filmda bolaligidan ota-ona mehridan yiroqda, mehribonlik uyida ulg‘aygan yigit taqdiri hikoya qilinadi. Yigit ulg‘aygach, o‘qish va mehnat bilan hayotda o‘z o‘rnini topishga intiladi. Biroq boy oilada katta bo‘lgan qizga ko‘ngil qo‘yishi, qiz yigitning hayotiga to‘satdan kirib qolishi uning maqsad va rejalarini butunlay o‘zgartirib yuboradi. Badavlat qiz esa, o‘ziga o‘xshagan yigitga turmushga chiqayotgan edi. Ammo qiz ham mehribonlik uyida tarbiyalangan aqlli, mehnatkash bu yigitni sevib qoladi. Boshida o‘rtalaridagi mehrni asl baxti deb o‘ylagan qizning fikrlari keyinchalik o‘zgaradi. Shundan so‘ng kutilmagan voqealar boshlanadi. Voqealar rivojiga qiziqayotganlar filmni tomosha qilib bilib olishi mumkin.
Izoh (0)